Эрондаги объектларга берилган зарбаларга АҚШ ҳарбийларининг ҳеч қандай алоқаси йўқ. Бу ҳақда Пентагон матбуот котиби Патрик Райдер маълум қилди, деб хабар бермоқда Reuters.
Америка ҳарбий идорасининг вакили батафсилроқ изоҳ беришдан бош тортди.
АҚШнинг зарбаларга алоқаси йўқлиги ҳақида Reutersъга бошқа америкалик расмийлар ҳам айтганди. Агентликнинг исми ошкор этилмаган расмийларга таяниб ёзишича, АҚШ бўлиб ўтган воқеада Исроилни айбламоқда.
Исфаҳондаги саноат мажмуасига ҳужум ҳақида Эрон Мудофаа вазирлиги 29 январь куни эрталаб хабар берди. Вазирлик маълумотларига кўра, учта дрондан зарба берилган. Улардан биттаси ҳаво ҳужумидан мудофаа тизими ёрдамида уриб туширилган, яна иккитаси “мудофаа тузоғига” тушиб, портлаб кетган.
Вазирлик хабарига кўра, ҳужум пайтида фақат ҳарбий корхона цехларидан бирининг томи бироз шикастланган. Кейинчалик Эроннинг давлат мудофаа мажмуасига алоқадор яна бир қанча заводларида портлашлар содир бўлди.
Аl-Arabia телеканалининг ёзишича, Исроил Эрон ҳарбий саноатини йўқ қилиш учун ушбу мамлакат ҳудудида махсус ҳарбий амалиёт бошлаган. Исроил томони бу хабар юзасидан муносабат билдирмаган.
Кейинроқ ОАВ Исфаҳондаги ҳарбий объектга уюштирилган дронлар ҳужумида АҚШ ҳарбий-ҳаво кучлари ва яна бир давлат айбдор экани ҳақида ёзди.
Изоҳ (0)