Ирина Шейк машҳур моделларнинг бири бўлишига қарамай, сўнгги коллекциялардан кийим сотиб олишни беҳуда иш деб ҳисоблайди, деб ёзади “Woman.ru”.
36 ёшли Ирина Шейк камдан кам ҳолатларда интервью беради, шахсий ҳаёти ҳақида ҳам камроқ гапиради. У беш йилдан бери оналик мақомига эга. Модель актёр Бредли Купердан Леа исмли қизни дунёга келтирган. Гарчи жуфтлик чақалоқ туғилгандан кейин дарҳол ажрашган бўлса ҳам, улар бола тарбияси билан биргаликда шуғулланиб келади.
Жуфтлик фарзандига энага ёллашдан воз кечишга қарор қилган ва бўш вақтларини қизи билан кўпроқ ўтказишга ҳаракат қилади. Уларнинг вақти бўлмаганда, қизалоқнинг бувиси ёрдамга келади.
Россиялик моделнинг сўзларига кўра, у илгари мода оламида бундай муваффақиятли карера қуриш ҳақида орзу ҳам қила олмаган. Бугунги кунда эса Ирина дунёдаги энг талабгир бешта моделдан бири ва унинг гонорари, эҳтимол, юз минглаб долларни ташкил этади. Лекин бу исрофгарчилик учун сабаб бўла олмайди. Маълум бўлишича, супермодель жуда тежамкор.
“Мен кўп йиллар давомида кийиш мумкин бўлган сифатли буюмларга сармоя киритиш тарафдориман. Аммо шунчаки ҳашаматли либос учун пул сарфлаш — бу жиннилик. Онам ойига 10 доллар ишлаб топарди. Мен ҳам бошқалар каби пул ва буюмнинг қадрини биламан. Чиндан ҳам тежамкорман, келаси йил фойдаланиб бўлмайдиган тенденцияларга пул сарфламайман”, — дейди у Испаниянинг Vogue нашрига берган интервьюсида.
Модель қизига нисбатан ҳам ушбу тамойилга амал қилади, унга керак бўлган ҳамма нарсани муҳайё қилади, лекин ҳашамат ва ортиқча нарсаларга пул сарфламайди.
Ушбу ёндашув туфайли Ирина фақат гардеробидаги юқори сифатли нарсаларга таянади. Албатта, у ўзининг мафтункорлигини таъкидлаш имконини берувчи кийимларни танлайди.
Шу билан бирга, Шейк жозибадорлик ташқи кўриниш, баланд пошнали туфли ёки макияж масаласи эмаслигига амин. Буни қизига ҳам ўргатиш ниятида.
Модель қизалоғи Леа билан илиқ ва ишончли муносабатларга эга ва у оналикни эга бўлиш мумкин бўлган энг яхши тажриба деб атайди.
“Оналик маълум бир кийим кийиш ёки ухлаш учун эрта ётиш керак, дегани эмас. Сиз ҳеч кимдан ҳеч нарса қарздор эмассиз”, — дея хулоса қилади модель.
Мавзуга доир:
Изоҳ (0)