АҚШ Давлат департаменти Беларусда 25 кишига, жумладан маҳаллий депутатларга нисбатан виза чекловларини жорий қилди. Бу ҳақда департамент матбуот хизматига таяниб, «Korrespondent.net» хабар берди.
«Лукашенко (Беларусь президенти) режими Беларусь халқи ва унинг демократик интилишларини, хусусан, демократик мухолифат етакчиси Светлана Тихановская ва бошқа демократик фаоллар устидан сиёсий сабабларга кўра сиртдан суд жараёни ўтказиш ҳамда асоссиз айбловлар билан уларни таъқиб қилишни давом эттирмоқда. Инсон ҳуқуқларининг бундай тарзда бузилишига жавобан Давлат департаменти АҚШ президентининг 8015-сонли декларациясига биноан демократияни бузишдаги роли учун 25 кишига нисбатан виза чекловларини эълон қилади», — дейилади хабарда.
Виза чекловлари Беларусь Миллий Ассамблеяси депутатларига нисбатан жорий этилди, бунга сабаб сифатида уларнинг «терроризмга уринишлар» даъвоси билан судланган шахсларга ўлим жазосини тайинлаш тўғрисидаги қонунни қабул қилишдаги роли кўрсатилган.
Давлат департаментининг қўшимча қилишича, бундай айбловлардан «демократик мухолифат ва фуқаролик жамиятини бостириш ва қўрқитиш учун» фойдаланилмоқда.
Расмий Вашингтоннинг таъкидлашича, режим тинч намойишчиларни, демократик мухолифатни, журналистларни, касаба уюшмалари фаолларини, ҳуқуқ ҳимоячилари ва оддий беларусларни таъқиб қилишда давом этаётган бир пайтда АҚШ четдан қараб турмайди.
Маълумот учун Беларусда мухолифатчи Светлана Тихановская устидан сиртдан суд жараёни бошланган.
Изоҳ (0)