Сайёрадаги энг кекса аёл, роҳиба Андре сифатида кўпроқ танилган Люсил Рендон 118 ёшида вафот этди. Бу ҳақда Гиннесс рекордлари китоби сайтида хабар берилди.
У 1904 йил 11 февраль куни Франция жанубида туғилган. Шу тариқа, Люсил 119 ёшга тўлишига 25 кун қолганида ҳаётдан кўз юмган.
Француз аёли шу йилнинг апрелида дунёдаги энг кекса аёл деб тан олинган эди, у бу мақомга қарийб тўққиз ой эгалик қилди. Ундан аввал япониялик Кане Танака сайёранинг энг кекса аёли ҳисобланарди, у 119 ёшида вафот этган.
Рендон ёшлигида ўқитувчи ва гувернант (бадавлат оилаларда болаларни тарбиялаш учун махсус ёлланган аёл) бўлиб ишлаган, Иккинчи жаҳон уруши йилларида болаларга қаровчилик қилган, кейин эса етимлар ва қариялар билан ишлаган. 1944 йилда католик роҳибаликка ўтган.
2021 йилда роҳиба Андре коронавирус билан касалланиб ўтди. Хасталик унда уч ҳафта давом этган, бироқ унда симптомлар ва асоратлар кузатилмаган.
Гиннесс рекордлари китоби талқинига кўра, Ер юзасида энг узоқ умр кечирган аёл франциялик Жанна Луиза Калман (1875—1997) бўлган, у 122 ёшида вафот этган. Эркаклар орасида эса япониялик Дзироэмон Кимура (1897—2013) энг кўп — 116 йил яшаган.
Изоҳ (0)