Ўзбекистон президенти Шавкат Мирзиёев 17 январь куни Сингапурга давлат ташрифини амалга оширмоқда. Давлат раҳбари ташриф доирасида мамлакат президенти ҳамда бош вазири билан учрашув ўтказди.
Шавкат Мирзиёев, шунингдек, сингапурлик бизнес эгалари билан ҳам учрашув ўтказди.
«Дарё» нашри Ўзбекистон—Сингапур муносабатлари ҳақида сўз юритади.
Икки мамлакат ўртасидаги дипломатик муносабатлар
1997 йилда Ўзбекистон ва Сингапур ўртасида дипломатик муносабатлар ўрнатилгандан буён икки мамлакат ўртасида мустаҳкам сиёсий ва иқтисодий шериклик йўлга қўйилди. 2007 йилдан буён Сингапурда Ўзбекистоннинг элчихонаси фаолият кўрсатмоқда.Сингапур БМТ Бош Ассамблеяси доирасида Ўзбекистон ташаббуси билан:- «Марказий Осиё минтақасида тинчлик, барқарорлик ва барқарор ривожланишни таъминлаш учун минтақавий ва халқаро ҳамкорликни мустаҳкамлаш» (2018 йил);
- «Маърифат ва диний бағрикенглик» (2018 йил);
- «Марказий Осиёда барқарор туризм ва барқарор тараққиёт» (2019 йил);
- «Оролбўйи минтақасини экологик инновациялар ва технологиялар ҳудуди деб эълон қилиш» (2021 йил);
- «Барқарор ривожланиш мақсадларига эришишни жадаллаштиришда парламентларнинг ролини кучайтириш» (2022 йил) каби резолюциялар;
- Марказий Осиёда ядро қуролидан холи ҳудудни яратиш тўғрисидаги шартноманинг (2009 йил) қабул қилинишини қўллаб-қувватлади.
- Сингапур Ўзбекистон Республикасининг Жаҳон савдо ташкилотига аъзо бўлиши бўйича ишчи гуруҳ аъзоси саналади.
Ўзбекистонда очилган университетлар ва янги ишга туширилган интерактив онлайн-дастурлар – таълим соҳасидаги ҳамкорлик
2008 йилдан буён Тошкентда Сингапур менежментни ривожлантириш институти (МДИС) фаолият кўрсатмоқда. 2021 йил 26 октябрда Тошкент технологиялар, менежмент ва коммуникациялар институти (ТМC) – Сингапурдаги ТМC академияси филиали ташкил қилинди. Келишувга мувофиқ, Тошкент шаҳридаги ТМC институти умумий даромади суммасининг 1 фоизини Оролбўйи минтақаси учун Инсон хавфсизлиги бўйича кўп томонлама шериклик Trast жамғармасига ўтказади.
2022 йил 22 октябрь куни ТМCънинг иккинчи кампуси очилиш маросими бўлиб ўтди. Талабалар сони 12,5 баробар ошди–2021 йилдаги 400 нафардан 2022 йилдаги 5000 нафаргача. Қорақалпоғистон Республикасидаги 300 та мактаб (2021 йил апрелдан 2021 йил декабргача) ҳамда Ўзбекистон Республикасининг 14 та Президент мактаблари учун (2020 йил 1-сентябрдан 2025 йил 31 августгача) инглиз тилини ўргатиш бўйича «Сикс Клоудс» Сингапур компаниясининг интерактив онлайн-дастури ишга туширилди.
Сўнгги 6 йилда Сингапур инвестицияларининг умумий ҳажми 700 млн долларни ташкил этди – савдо-иқтисодий ҳамкорлик
Сингапур ва Ўзбекистон деярли барча соҳаларда, айниқса, савдо-иқтисодий ва инвестицион соҳаларда ҳамкорликни кучайтириш учун фойдаланилмаган улкан салоҳиятга эга. 2007 йилда имзоланган «Ўзбекистон Республикаси ҳукумати ва Сингапур Республикаси ҳукумати ўртасида иқтисодий ва гуманитар ҳамкорликнинг асосий йўналишлари тўғрисида»ги битимнинг 3-моддасига мувофиқ ўзаро савдода энг кўп қулайлик режими яратилди.2021 йилда икки томонлама ўзаро савдо ҳажми 179,2 млн долларни (+42,6 %), жумладан: экспорт – 104 млн доллар (+79,3 %), импорт – 75,2 млн долларни (+11,2 %) ташкил этди. 2022 йилда бу кўрсаткич 142,7 млн долларни (- 20%), жумладан экспорт 104,8 млн доллар (+0,01%), импорт 37,9 млн долларни (-49%) ташкил этди.
Экспортнинг асоси: қора металлар ва улардан тайёрланган буюмлар (69,6%), қурилиш материаллари (5,5%), хизматлар (17,9%) ва бошқалар. Импортнинг асоси: хизматлар (77,9%), каучук, резина ва улардан тайёрланган буюмлар (8,1%), оптик аппаратлар ва асбоблар (4,9%), механик ускуналар (3,6%), тўқимачилик маҳсулотлари (2,3%) ва бошқалар.
2016–2022 йилларда давомида Сингапур инвестицияларининг умумий ҳажми 700 млн долларни ташкил этди. 2022 йилда қуйидаги лойиҳаларни амалга ошириш доирасида 38 млн долларга тенг инвестициялар ўзлаштирилди:
- Қўқон суперфосфат заводини Сингапурнинг Indorama компанияси томонидан модернизация қилиш учун – 30 млн доллар;
- Тошкент шаҳрида Сингапурнинг ТМC Институте олий таълим муассасасининг иккинчи кампусини очиш учун - 8 млн доллар.
- Indorama Коканд техтиле – пахта-ип калаваси ишлаб чиқариш (2010 йил). Инвестициялар ҳажми – 240 млн доллар;
- Ип ва тайёр тўқимачилик маҳсулотлари ишлаб чиқариш бўйича Indorama Agro тўқимачилик кластери (Қашқадарё ва Сирдарё вилоятлари) (2018 йил). Инвестициялар ҳажми – 340 млн доллар;
- Суперфосфат ва аммиак ишлаб чиқарувчи Қўқон суперфосфат заводини хусусийлаштириш (2019 йил). Инвестициялар ҳажми – 67 млн доллар, оширилган қуввати – йилига 640 минг тонна (100 минг тоннадан).
Изоҳ (0)