Профессионал бокс бўйича ўта енгил вазн тоифасининг мутлақ чемпиони Ноая Иноуэ (24-0-0, 21 КО) ўз дивизиони ўзгартиришини маълум қилди.
Япониялик боксчи барча камарларидан воз кечган ва биринчи ярим енгил вазн тоифасига ўтмоқда.
«Бугун сўнгги тўрт йил-у етти ойда қўлга киритган тўртта камаримни топшираман. 2023 йилда вазн тоифамни биринчи ярим енгилга ўзгартираман ва чемпионларга чорлов ташлайман», — дея ёзди боксчи ўз Instagram саҳифасида.
Биринчи ярим енгил вазн тоифасида Муроджон Аҳмадалиев (11-0, 8 КО) ҳаракат қилади. Ўзбекистонлик боксчи IBF ва WBA чемпионлик камарларига эгалик қилади.
Аввалроқ Аҳмадалиев кейинги жангини 2023 йилнинг апрель ойида Марлон Тапалесга (36-3, 19 КО) қарши ўтказиши хабар қилинганди. 28 ёшли ўзбекистонлик боксчи 2020 йил бошида Даниэль Романни мағлуб этиб, иккита камарга эга чиққанди. Кейинчалик Муроджон Рёсуке Иваса ва Ронни Риосга қарши жангларда камарларини муваффақиятли ҳимоя қилди.
Иноуэ 2022 йилнинг декабрида Пол Батлер (34-3-0, 15 КО) устидан ғалаба қозониб, ўта енгил вазн тоифасининг мутлақ чемпионига айланганди.
Изоҳ (0)