Mutlaq chempion Naoya Inoue kamarlaridan voz kechib, Murodjon Ahmadaliyevning vazn toifasiga o‘tmoqda

Professional boks bo‘yicha o‘ta yengil vazn toifasining mutlaq chempioni Noaya Inoue (24-0-0, 21 KO) o‘z divizioni o‘zgartirishini ma’lum qildi.

Yaponiyalik bokschi barcha kamarlaridan voz kechgan va birinchi yarim yengil vazn toifasiga o‘tmoqda.

“Bugun so‘nggi to‘rt yil-u yetti oyda qo‘lga kiritgan to‘rtta kamarimni topshiraman. 2023-yilda vazn toifamni birinchi yarim yengilga o‘zgartiraman va chempionlarga chorlov tashlayman”, — deya yozdi bokschi o‘z Instagram sahifasida.

Birinchi yarim yengil vazn toifasida Murodjon Ahmadaliyev (11-0, 8 KO) harakat qiladi. O‘zbekistonlik bokschi IBF va WBA chempionlik kamarlariga egalik qiladi.

Avvalroq Ahmadaliyev keyingi jangini 2023-yilning aprel oyida Marlon Tapalesga (36-3, 19 KO) qarshi o‘tkazishi xabar qilingandi. 28 yoshli o‘zbekistonlik bokschi 2020-yil boshida Daniel Romanni mag‘lub etib, ikkita kamarga ega chiqqandi. Keyinchalik Murodjon Ryosuke Ivasa va Ronni Riosga qarshi janglarda kamarlarini muvaffaqiyatli himoya qildi.

Inoue 2022-yilning dekabrida Pol Batler (34-3-0, 15 KO) ustidan g‘alaba qozonib, o‘ta yengil vazn toifasining mutlaq chempioniga aylangandi.