Мусиқа инсоннинг ҳиссий, руҳий кечинмаларини ўзида жамлайди. Ҳар бир инсон ўз ҳолатидан келиб чиқиб, оҳанглари, ундаги сўзлари қалбига яқин бўлган мусиқий асарларни тинглаб ҳузур олади. Жумладан, ҳар бир мусиқий жанр ўз мухлисларига эга эканини таъкидлаш мумкин. Шу жанрларнинг бири рэп ҳисобланади, унда оҳанг ва маъно тўғридан-тўғри инсоннинг руҳий ҳолатига катта таъсир кўрсатади.
Ўзбек рэп йўналишида ижод қилаётган ёш, истеъдодли ижодкорлар бугунги кунда нафақат инсоннинг ички кечинмалари, ҳиссиётлари, руҳий ҳолатини ифода этувчи, балки жамиятдаги айрим муаммоларга бағишланган мусиқалари билан кўплаб мухлисларнинг қалбидан жой эгалламоқда. Уларнинг мусиқалари ижтимоий тармоқларда кенг муҳокама қилиниб, эътироф этилмоқда. «Дарё» нашри машҳур ўзбек рэперлари ижодини қандай бошлагани ҳақида маълумот беради.
Конста — Абдуллаев Шариф Шокир ўғли
«Билмайди», «Алоҳида» «Биз йўқ жойда» «Одамлар нима дейди» номли ва бошқа кўплаб тароналари билан мухлисларнинг қалбини забт этган ўзбек реп йўналишининг истеъдодли вакили Конста тахаллуси билан ижод қилувчи ижодкор, яъни Абдуллаев Шарифжон Шокир ўғли, 1992 йилнинг 9 сентябрида Сирдарё вилоятининг Гулистон шаҳрида туғилган.
Ижодкор 1999—2008 йилларда Гулистондаги «Қувонч» боғча-мактаб мажмуасида таҳсил олган. У кейинчалик ўқишини Зангиота туманида жойлашган Тошкент банк ҳисоб-кредит коллежида давом эттирган. Конста (ўша вақтлар бошқа тахаллус остидаги) айнан коллежда таҳсил олаётган вақтда биринчи бор овоз ёзиш студиясига борган. Шундан сўнг, Шарифжон Россиянинг Москва шаҳрига бориб ишлаган. У Москвада ўзига Конста тахаллусини олади ва ўша вақтларда таниқли бўлган рус студиялари: Cао, ZM’да ўз ашулаларини ёза бошлайди.
Конста ижодий фаолиятини 2012—2015 йиллари Москвада бошлаб, 2015—2016- йили ўз шаҳри Гулистонда, 2016—2017 йилда Озарбайжоннинг Боку шаҳрида олиб борган ва 2018 йилдан бошлаб ҳозирги кунгача Тошкентда давом эттирмоқда. Ижодкор 2020 йилда «Алҳимик», 2021 йилда «Биз йўқ жойда» ва 2022 йилда «Инсон» номли альбоми мухлисларига тақдим этилди. Унинг тароналарида нафақат, муҳаббат, балки, ота-она, жамиятдаги муаммолар, инсоннинг руҳий ҳолати ҳақидаги мавзулар алоҳида ўрин олган.
Тимур Алихонов
Инстаблогер, рэпер Тимур Алихонов Ғайрат ўғли 1999 йилнинг 5 декабрда Сирдарё вилоятининг Гулистон шаҳрида туғилган. Дастлаб ижодини 2019 йилда, пандемия даврида, вайнерлик йўналишида бошлаган ижодкор Москвадаги журналистика университетларининг бирида таҳсил олган. Бироқ, молиявий шароит туфайли ўқишини тугатмасдан ташлаб кетган.
Тимур Алихонов 2021 йилда «Йилнинг энг яхши блогери» сифатида «Таҳсин» мукофотини қўлга киритган. Ҳозирда вайн йўналиши ва хонандаликни параллел равишда олиб бораётган ижодкор «Агарда пуллар», Конста билан ҳамкорликда «Одамлар нима дейди», «Бой» номли тароналарини мухлисларига тақдим этган. Тимур Алихоновнинг Instagram’даги обуначилари сони 798 мингтани ташкил этади.
Шака — Қаршиев Шаҳриёр Аҳрор ўғли
Шака тахаллуси остида ижод қилувчи рэпер Қаршиев Шаҳриёр Аҳрор ўғли 1992 йилнинг 10 май санасида Тошкент вилоятининг Оҳангарон туманида туғилган. Дастлаб ўрта мактабда ўқиган ижодкор кейинчалик республика ҳарбий-мусиқий мактабда таҳсил олган.
«Мен мусиқа оламига болалигимдан кириб келганман. Фортепиано чалишни етти ёшимдан ўрганганман. Мен 4-синфгча ўрта мактабда ўқиб, шоир сифатида танилганман. Шеъриятни реп билан боғлашимга менинг бир қариндошим туртки бўлган. У 2002 йилда Эминемнинг кассетасини олиб келиб, менга реп нималигини ўргатган. Ўн ёшимдан бери реп билан тинимсиз шуғулланаман», — дейди рэпер.
Millymallymoe — Шокир
Ўзбек реп оламида ўз услубига эга бўлган Millymallymoe тахаллуси остида ижод қилаётган рэпер Шокир 1994 йилда Тошкент шаҳрида туғилган. У 12-13 ёшидан мусиқага қизиқа бошлаган. Ижодкор классик йўналишдаги мусиқаларни тинглашни ёқтиради. Ҳамкасблари Конста, Масса билан дуэт куйлаган Шокир фаолиятининг дастлабки йилларида русча тароналарни куйлаган. Рэпернинг «Ёмон», Конста билан куйлаган «Чумоли» мусиқалари мухлислар эътиборига сазовор бўлган.
Мавзуга доир: Dili.me, Liil Xurramov, Азода ва ўзини хонандаликда синаб кўраётган бошқа блогерлар (видео).
Изоҳ (0)