Musiqa insonning hissiy, ruhiy kechinmalarini o‘zida jamlaydi. Har bir inson o‘z holatidan kelib chiqib, ohanglari, undagi so‘zlari qalbiga yaqin bo‘lgan musiqiy asarlarni tinglab huzur oladi. Jumladan, har bir musiqiy janr o‘z muxlislariga ega ekanini ta’kidlash mumkin. Shu janrlarning biri rep hisoblanadi, unda ohang va ma’no to‘g‘ridan to‘g‘ri insonning ruhiy holatiga katta ta’sir ko‘rsatadi.
O‘zbek rep yo‘nalishida ijod qilayotgan yosh, iste’dodli ijodkorlar bugungi kunda nafaqat insonning ichki kechinmalari, hissiyotlari, ruhiy holatini ifoda etuvchi, balki jamiyatdagi ayrim muammolarga bag‘ishlangan musiqalari bilan ko‘plab muxlislarning qalbidan joy egallamoqda. Ularning musiqalari ijtimoiy tarmoqlarda keng muhokama qilinib, e’tirof etilmoqda. “Daryo” nashri mashhur o‘zbek reperlari ijodini qanday boshlagani haqida ma’lumot beradi.
Konsta — Abdullayev Sharif Shokir o‘g‘li
“Bilmaydi”, “Alohida” “Biz yo‘q joyda” “Odamlar nima deydi” nomli va boshqa ko‘plab taronalari bilan muxlislarning qalbini zabt etgan o‘zbek rep yo‘nalishining iste’dodli vakili Konsta taxallusi bilan ijod qiluvchi ijodkor, ya’ni Abdullayev Sharifjon Shokir o‘g‘li, 1992-yilning 9-sentabrida Sirdaryo viloyatining Guliston shahrida tug‘ilgan.
Ijodkor 1999—2008-yillarda Gulistondagi “Quvonch” bog‘cha-maktab majmuasida tahsil olgan. U keyinchalik o‘qishini Zangiota tumanida joylashgan Toshkent bank hisob-kredit kollejida davom ettirgan. Konsta (o‘sha vaqtlar boshqa taxallus ostidagi) aynan kollejda tahsil olayotgan vaqtda birinchi bor ovoz yozish studiyasiga borgan. Shundan so‘ng, Sharifjon Rossiyaning Moskva shahriga borib ishlagan. U Moskvada o‘ziga Konsta taxallusini oladi va o‘sha vaqtlarda taniqli bo‘lgan rus studiyalari: Cao, ZM’da o‘z ashulalarini yoza boshlaydi.
Konsta ijodiy faoliyatini 2012—2015-yillari Moskvada boshlab, 2015—2016- yili o‘z shahri Gulistonda, 2016—2017-yilda Ozarbayjonning Boku shahrida olib borgan va 2018-yildan boshlab hozirgi kungacha Toshkentda davom ettirmoqda. Ijodkor 2020-yilda “Alhimik”, 2021-yilda “Biz yo‘q joyda” va 2022-yilda “Inson” nomli albomi muxlislariga taqdim etildi. Uning taronalarida nafaqat, muhabbat, balki, ota-ona, jamiyatdagi muammolar, insonning ruhiy holati haqidagi mavzular alohida o‘rin olgan.
Timur Alixonov
Instabloger, reper Timur Alixonov G‘ayrat o‘g‘li 1999-yilning 5-dekabrda Sirdaryo viloyatining Guliston shahrida tug‘ilgan. Dastlab ijodini 2019-yilda, pandemiya davrida, vaynerlik yo‘nalishida boshlagan ijodkor Moskvadagi jurnalistika universitetlarining birida tahsil olgan. Biroq, moliyaviy sharoit tufayli o‘qishini tugatmasdan tashlab ketgan.
Timur Alixonov 2021-yilda “Yilning eng yaxshi blogeri” sifatida “Tahsin” mukofotini qo‘lga kiritgan. Hozirda vayn yo‘nalishi va xonandalikni parallel ravishda olib borayotgan ijodkor “Agarda pullar”, Konsta bilan hamkorlikda “Odamlar nima deydi”, “Boy” nomli taronalarini muxlislariga taqdim etgan. Timur Alixonovning Instagram’dagi obunachilari soni 798 mingtani tashkil etadi.
Shaka — Qarshiyev Shahriyor Ahror o‘g‘li
Shaka taxallusi ostida ijod qiluvchi reper Qarshiyev Shahriyor Ahror o‘g‘li 1992-yilning 10-may sanasida Toshkent viloyatining Ohangaron tumanida tug‘ilgan. Dastlab o‘rta maktabda o‘qigan ijodkor keyinchalik respublika harbiy-musiqiy maktabda tahsil olgan.
“Men musiqa olamiga bolaligimdan kirib kelganman. Fortepiano chalishni yetti yoshimdan o‘rganganman. Men 4-sinfgcha o‘rta maktabda o‘qib, shoir sifatida tanilganman. She’riyatni rep bilan bog‘lashimga mening bir qarindoshim turtki bo‘lgan. U 2002-yilda Eminemning kassetasini olib kelib, menga rep nimaligini o‘rgatgan. O‘n yoshimdan beri rep bilan tinimsiz shug‘ullanaman”, — deydi reper.
Millymallymoe — Shokir
O‘zbek rep olamida o‘z uslubiga ega bo‘lgan Millymallymoe taxallusi ostida ijod qilayotgan reper Shokir 1994-yilda Toshkent shahrida tug‘ilgan. U 12-13 yoshidan musiqaga qiziqa boshlagan. Ijodkor klassik yo‘nalishdagi musiqalarni tinglashni yoqtiradi. Hamkasblari Konsta, Massa bilan duet kuylagan Shokir faoliyatining dastlabki yillarida ruscha taronalarni kuylagan. Reperning “Yomon”, Konsta bilan kuylagan “Chumoli” musiqalari muxlislar e’tiboriga sazovor bo‘lgan.
Mavzuga doir: Dili.me, Liil Xurramov, Azoda va o‘zini xonandalikda sinab ko‘rayotgan boshqa blogerlar (video).
Izoh (0)