Genesis Global Trading криптовалюта компанияси раҳбарияти ходимларнинг 30 фоизга қисқаришини эълон қилди ва банкротлик тўғрисида ариза бериш имкониятини кўриб чиқмоқда. Бу ҳақда The Wall Street Journal (WSJ) дунёдаги энг йирик криптовалюта кредиторларидан биридаги ўз манбаларига таяниб хабар бермоқда.
Қисқартириш компаниянинг барча бўлимларига таъсир кўрсатди, дея таъкидлайди нашр. 5 январь куни 60 га яқин ходим ишдан бўшатилган. Ҳозир Genesis’да атиги 145 киши ишламоқда.
Ўтган йилнинг ўрталаридан бери компания жиддий муаммоларни бошдан кечирмоқда. Компаниянинг молиявий барқарорлигига биринчи зарба Three Arrows Capital криптовалюта фондининг банкротлиги бўлди.
Бир вақтлар Genesis унга 2,4 миллиард доллар миқдорида кредит берган эди ва Three Arrows банкротлиги эълон қилинганидан бир ой ўтгач, Genesis раҳбарияти ўз ходимларининг 20 фоизини қисқартиришини эълон қилди.
Криптовалюта кредиторига иккинчи катта зарба ўтган ноябрь ойида FTX ва Alameda Research компанияларининг банкротлиги бўлди. WSJ манбаларига кўра, Genesis Аламедага камида юзлаб миллион доллар қарз берган.
FTX криптобиржаси қулаганидан бир неча кун ўтгач, Genesis раҳбарияти кредитларни бериш ва тўлаш тўхтатилганини эълон қилганди.
Аввалроқ 2022 йил криптовалюта ўғирлашлар сони бўйича рекорд йил бўлган эди.
Изоҳ (0)