Genesis Global Trading kriptovalyuta kompaniyasi rahbariyati xodimlarning 30 foizga qisqarishini e’lon qildi va bankrotlik to‘g‘risida ariza berish imkoniyatini ko‘rib chiqmoqda. Bu haqda The Wall Street Journal (WSJ) dunyodagi eng yirik kriptovalyuta kreditorlaridan biridagi o‘z manbalariga tayanib xabar bermoqda.
Qisqartirish kompaniyaning barcha bo‘limlariga ta’sir ko‘rsatdi, deya ta’kidlaydi nashr. 5-yanvar kuni 60 ga yaqin xodim ishdan bo‘shatilgan. Hozir Genesis’da atigi 145 kishi ishlamoqda.
O‘tgan yilning o‘rtalaridan beri kompaniya jiddiy muammolarni boshdan kechirmoqda. Kompaniyaning moliyaviy barqarorligiga birinchi zarba Three Arrows Capital kriptovalyuta fondining bankrotligi bo‘ldi.
Bir vaqtlar Genesis unga 2,4 milliard dollar miqdorida kredit bergan edi va Three Arrows bankrotligi e’lon qilinganidan bir oy o‘tgach, Genesis rahbariyati o‘z xodimlarining 20 foizini qisqartirishini e’lon qildi.
Kriptovalyuta kreditoriga ikkinchi katta zarba o‘tgan noyabr oyida FTX va Alameda Research kompaniyalarining bankrotligi bo‘ldi. WSJ manbalariga ko‘ra, Genesis Alamedaga kamida yuzlab million dollar qarz bergan.
FTX kriptobirjasi qulaganidan bir necha kun o‘tgach, Genesis rahbariyati kreditlarni berish va to‘lash to‘xtatilganini e’lon qilgandi.
Avvalroq 2022-yil kriptovalyuta o‘g‘irlashlar soni bo‘yicha rekord yil bo‘lgan edi.
Izoh (0)