Муҳаммад Салоҳ «Ливерпуль»да Кенни Далглишнинг натижасини такрорлади

«Ливерпуль» ҳужумчиси Муҳаммад Салоҳ Премер Лигаси доирасида кечган «Астон Вилла»га қарши баҳсда (3:1) гол уришга эришди.

Бу мисрлик футболчи учун АПЛ доирасида мерсисайдлар сафидаги 125-гол бўлди. Шунингдек, бу ўйинда Салоҳ «Ливерпуль»даги 50-голли узатмасини амалга оширди.

Муҳаммад «қизиллар» сафида Премер Лигадаги 195 ўйинда «гол+пас» тизимида 175 очко (125+50) тўплади. У «Ливерпуль»да 2017/18 йилги мавсумдан бери ҳаракат қилиб келади.

30 ёшли ҳужумчи «Ливерпуль»даги умумий голларини 172 тага етказди ва клуб тарихидаги энг яхши тўпурарлар рўйхатида 7-ўриндаги Кенни Далглишга етиб олди. Далглишга бу маррани забт этиш учун 515 ўйин керак бўлганди, Салоҳ эса 277 та ўйинда шунча гол урди.

«Ливерпуль» тўпурарлар рўйхати қуйидаги кўринишни олган:

1. Иан Раш (346 гол)
2. Рожер Ҳант (285)
3. Гордон Ҳожсон (241)
4. Билли Лидделл (186)
5. Стивен Жеррард (186)
6. Робби Фаулер (183)