Актёрлар томонидан импровизация қилинган ва картинанинг культ саҳнасига айланган машҳур фильмлардаги кадрлар (видео)
Актёрлар томонидан импровизация қилинадиган кадрлар ҳар доим ҳам муваффақиятсиз чиқиб, кесиб ташланмайди — баъзида улар ҳатто культга айланиши мумкин.
«Қасоскорлар»
Кичик Роберт Дауни суратга олиш майдончасига яширинча овқат олиб келаверади, у буни шунчалик кўп қиладики, режиссёрлар актёр билан доимий курашиш ўрнига, улар Темир одамнинг йўлда овқатланиш одатиини сюжетга киритишади. Балки «Қасоскорлар»нинг биринчи фильмида Тони Старк дунёни ўзга сайёраликлар босқинидан қутқарганидан кейин емоқчи бўлган шаурмасиз фильм қизиқарли бўлмасмиди?
«Титаник»
«Титаник»нинг тумшуғида турган Жек Доусоннинг «Мен дунё қиролиман!» деб қичқирган саҳнаси Леонардо Ди Каприо томонидан бутунлай импровизация қилинган.
«Хоббит»
«Хоббит» фильмидаги Гендалфнинг бошини тинимсиз нимагадир урволиши сценарий бўйича атайлаб қилинмаган. Лекин бу ҳолат шундай табиий кўринганки, бундай эпизодни фильмга киритишга қарор қилишади.
«Индиана Жонс: Йўқолган кема изидан»
«Индиана Жонс: Йўқолган кема изидан» фильмидаги жанг саҳнаси бутун картинадаги энг эпик воқеа бўлиши керак эди. Тайёргарлик учун деярли уч ой вақт кетади, лекин суратга олиш вақтида дизентерия (ўткир ичак инфекцияси) билан оғриган Харрисон Форд қамчини ўйната олмайдиган даражада ҳолдан тойган эди, Стивен Спилберг эса душманни шунчаки отиб ташлашни таклиф қилади ва улар шундай қилишади.
«Озод Жанго»
Квентин Тарантинонинг «Озод Жанго» фильмидаги Келвин Кендининг уйидаги меҳмонларга қаршилик қилгани эсингиздами? Леонардо Ди Каприо қаҳрамони ғазадан столга уриб, биллур стаканни синдириб ташлайди. Бу кадр аслида сценарийда бўлмаган, шунинг учун актёр ростан ҳам қўлини кесиб олади, лекин оғриқ ва қўлидан оқаётган қонга эътибор бермасдан рол ўйнашни давом эттиради.
«Қора рицар»
Кристофер Ноланнинг машҳур Бетмен трилогияси ҳам импровизациясиз қолмайди. Жокер касалхонани портлатиш учун тугмани босганда, босиш ва портлаш ўртасидаги кечикиш ҳам экипаж, ҳам актёр кутганидан анча узоқ давом этади. Яхшиямки, Хит Лежер ўзини йўқотиб қўймайди, тугмачани қайта-қайта босади ва кинодаги энг ажойиб саҳналардан бирини тақдим этади.
«Гўзал аёл»
Жулия Робертс ва Ричард Гир ўйнаган «Гўзал аёл» фильмидаги ёқут маржон саҳнаси сценарийда ёзилмаган. Шунинг учун, актриса жуда самимий кулади ва футляр қўли тегиши билан ёпилиб қолганда чиндан ҳам ҳайратда қолади. Бу кадр шу қадар жозибали бўлиб чиқадики, монтажда бу лаҳзани кесмасликка қарор қилинади.
«Чўқинтирган ота»
«Чўқинтирган ота» фильмидаги Марлон Брандони мушуксиз тасаввур қила оласизми? Бироқ мушук бўлиши сценарийда ёзилмаган ва кадрга ўз-ўзидан қўшилган. Баъзилар Брандонинг ўзи уй ҳайвонини тиззасига қўйганини айтишса, бошқалари бу режиссёр Френсис Форднинг қарори эканлигини таъкидлайди.
«Ёғду»
«Жонни шу ерда!», деб қичқиради ғазабга минган Жек Николсон «Ёғду» фильмида эшикни болта билан синдирар экан (бу саҳнада 60 та эшик «синдирилган» дейишади). Шундай қилиб, фильмнинг тожига айланган бу ибора импровизация натижаси ва актёрнинг ўзи буни Жонни Карсоннинг машҳур кечки шоусидан олганини айтади.
«Модель эркак»
Бен Стиллер «Модель эркак» эпизодларидан бирида репликасини унутади, шунинг учун Дэвид Духовнининг қаҳрамони нега моделлардан серияли қотиллар сифатида фойдаланилади деган саволига жавоб бераётганида, Дерек Зуландер (Бен Стиллер ўйнаган) худди шу саволни яна сўрайди. Шу жумла билан яна бир бор Дерек Зуландернинг ақлли эмаслиги кўрсатиб берилади ва режиссёрлар бу кадрни қолдиришга қарор қилишади.
Мавзуга доир:
Жонни Депп «Кариб денгизи қароқчилари» фильмига қайтмоқда. Лекин осонлик билан эмас
«Гарри Поттер» мухлисларининг жиддий саволларига сабаб бўлган фильмдаги баъзи кадрлар (фото)
