Зеленскийнинг ФИФА томонидан кўрсатилиши тақиқланган мурожаати эълон қилинди (видео)
Украина президенти Владимир Зеленскийнинг Халқаро футбол федерацияси (ФИФА) томонидан тақиқланган мурожаати эълон қилинди.
Украина футбол ассоциацияси президенти Андрей Павелко ўзининг Facebook’даги саҳифасида Зеленскийнинг видеомурожаатини жойлади. Унда президент Қатардаги стадион экранларидан бўлмаса-да, гаджетлар экранидан буни кўриш кераклигини айтган.
«Ушбу жаҳон чемпионати турли мамлакат ва халқлар орасида ким кучли эканини олов билан эмас, ҳалол ўйинда ҳал қилиши мумкинлигини қайта-қайта исботлайди. Қизил жанг майдонида эмас, яшил ўйин майдонда. Дунёдаги ҳар бир ота ўғлини футбол ўйинига олиб боришни, ҳар бир она ўғлининг урушдан қайтишини хоҳлайди. Украина ҳамма нарсадан кўра кўпроқ тинчликни истайди. Биз тинчлик формуласини таклиф қиламиз, чунки урушда чемпион бўлмайди ва дуранг ҳам бўлиши мумкин эмас.
Шу боис барча халқларни тинчлик йўлида бирлаштириш мақсадида жорий қишда Глобал тинчлик формуласи саммитини ўтказиш ташаббусини эълон қиламан. Ўйинлар тугагандан сўнг стадионлар бўш, уруш тугаганидан кейин эса шаҳарлар бўш қолади. Шунинг учун уруш мағлуб бўлиши, дунё эса чемпион бўлиши керак. Ҳозир Қатарда бўлгани каби. Илтимос, Украинани тинчлик ўрнатиш йўлида қўллаб-қувватланг. Глобал тинчлик формуласи саммитига қўшилинг», — дейди у.
Аввалроқ Зеленский Канн фестивалида ва «Гремми» мусиқий мукофотларини топшириш маросимида нутқ билан чиққан. Украина етакчисининг офиси унинг «Оскар»да ҳам чиқиш қилишини ташкиллаштирмоқчи бўлган, бироқ бу амалга ошмаган.
