Маск Twitter’да блокланган журналистларнинг аккаунтларини қайтариб беришини маълум қилди

Америкалик тадбиркор ва Twitter эгаси Илон Маск журналистларнинг блокланган аккаунтларини зудлик билан тиклашини айтди. Бу ҳақда у ижтимоий тармоқда маълум қилган.

«Менинг жойлашувим ҳақида хабар берган аккаунтларни блоклаш энди тўхтатилади», — деб ёзди у Twitter’даги саҳифасида.

Маск Twitter’да фойдаланувчилардан «аниқ жойлашувини ошкор қилган» журналистларнинг аккаунтларини қачон блокдан чиқаришни ҳал қилишни сўраб сўров ўтказган эди.

Дастлаб сўровномада тўртта жавоб варианти мавжуд эди: «дарҳол», «эртага», «бир ҳафтада», «узоқроқ вақт ичида». Респондентларнинг аксарияти (43 фоиз) ҳисобларни блокдан чиқаришни зудлик билан қўллаб-қувватлаган.

Бироқ, сўровнома натижалари эълон қилинганидан сўнг, Маск иккита вариантга эга бўллан янги сўровни ўтказишга қарор қилди.

Натижада овоз берганларнинг 58,7 фоизи зудлик билан блокдан чиқариш тарафдори, яна 41,3 фоизи ҳисобларни етти кун ичида блокдан чиқариш тарафдори бўлди.

Аввалроқ Twitter бир қатор америкалик журналистларнинг аккаунтини блоклагани ҳақида хабар берилганди.