5 700 сўмдан АИ-80 сотаётган шохобчалар сони ошди: Тошкентда кунлик бензин нархлари эълон қилинди

UNG Petro 17 декабрь куни Тошкент шаҳрида бензин қуйиш шохобчаларидаги нархларни эълон қилди.

Унга кўра, АИ-80 Тошкентдаги учта бензин қуйиш шохобчасида 5 700 сўмдан сотилмоқда. Булар UNG Petro, Poytaxt Oil ва Miss Petrol. 

Poytaxt Oil’да АИ-80 нархи бир кун ичида 700 сўмга арзонлаган. Шу тариқа Тошкентда АИ-80 бензинини 5 700 сўмдан таклиф қилаётган шохобчалар сони яна биттага кўпайди. 

Нархларнинг тушиши АИ-80 бензини учун акциз солиғи бекор қилингани билан изоҳланади. 

АИ-80 Tatneft бензин қуйиш шохобчасида энг қиммат нархда сотилмоқда — 1 литр учун 6 800 сўм. Шунга қарамай, мазкур нарх 13 декабрга нисбатан 700 сўмга арзонроқ. 

Tatneft шохобчаси, шунингдек, АИ-92 ва АИ-95 турдаги бензинларни ҳам  энг баланд нархда таклиф қилмоқда — 1 литр учун мос равишда 12 500 сўм ва 14 000 сўм билан сотилмоқда. Нархлар бир ойдан бери ўзгармай келади.  

АИ-92 учун энг арзон нархни бир йўла бешта бензин қуйиш шохобчалари (UNG Petro, Poytaxt Oil, Miss Petrol, IBR Petroleum Station ва Mustang) таклиф қилмоқда — 9 500 сўм. 

АИ-95 турдаги бензинни эса энг арзон нархда мижозларга UNG Petro қуйиб бермоқда — 1 литрига 10 500 сўм. Энг арзон АИ-95 нархи 25 ноябрга нисбатан ўзгармаган. 

Март ойидаги маълумотлардан фарқли равишда АИ-98 нархлари ҳеч қайси бензин қуйиш шохобчасида кўрсатилмаган.

Аввалроқ Ўзбекистонда АИ-80 бензини ишлаб чиқариш ҳажми 50 фоиздан кўпроққа оширилгани ҳақида хабар берилган эди.