Қашқадарё вилоятининг Миришкор туманида ёшлар спортига қаратилган эътибор сабаб 5 нафар жаҳон ва 5 нафар мамлакат чемпиони етишиб чиққан. Бу ҳақда туман ҳокими Шерали Санаев фаоллар ва ёшлар билан мулоқотида маълум қилди.
Жорий йил 47 нафар миришкорлик спортчи мамлакат, Осиё ва жаҳон мусобақаларида фахрли ўринларни қўлга киритган. Жумладан, беш нафар ёш жаҳон чемпиони, икки нафари халқаро мусобақалар ғолиби, уч нафари Осиё чемпиони бўлган. Осиё мусобақаларида ҳам икки нафар ёш 2-ўринни ва икки нафари 3-ўринни эгаллаган, — деди Шерали Санаев.
Қўшимча қилинишича, туманда беш нафар спортчи мамлакат чемпиони бўлган. Шунингдек, 16 нафари Ўзбекистон чемпионатларида фахрли ўринни олган бўлса, икки нафари Ўзбекистон Кубоги соҳиби бўлган.
Туманимизда Мухторали Муртозаев, Нодир Самандаров, Шербек Азаматов, Сарвар Рўзиев ва Шоҳрух Мамедов каби Жаҳон чемпионлари етишиб чиққани, раҳбар сифатида мени фахрлантиради. Улар бизнинг қаҳрамонларимиз. Бугунимиз, эртамиз. Ислоҳотлар нафақат иқтисодиётга, балки, таълим ва спорт йўналишида ҳам ёшларимизга дарвозаларни кенг очди. Иқтидорларни қўллаб-қувватлаш ва улар рўёбга чиқаришда амалдаги сиёсат муҳим омил бўлмоқда. Натижада, миришкорлик ёшлар ҳам жаҳон саҳналарида Юрт байроғини юқори кўтармоқда, — деди туман раҳбари.
Изоҳ (0)