Владимир Норов АҚШнинг Вашингтон шаҳрида Оролбўйи минтақасини қўллаб-қувватлаш учун маблағ йиғиш бўйича хайрия тадбирида иштирок этди, деб хабар бермоқда ТИВ матбуот хизмати.
Қайд этилишича, АҚШдаги элчихона томонидан Project C.U.R.E. хайрия ташкилоти билан биргаликда ташкил этилган тадбирда АҚШ Халқаро тараққиёт агентлиги (USAID), Американинг Vector Medical Group (тиббий асбоб-ускуналар етказиб берувчи), Bollore (авиация логистикаси), Boeing Company (авиация, космик ва ҳарбий техника), Rotary International (хайрия ташкилоти), Winn-Marion Companies (технология компанияси) каби компаниялари вакиллари, Америка-Ўзбекистон Савдо палатаси аъзолари, шунингдек АҚШ оммавий ахборот воситалари журналистлари қатнашди.
Тадбир кенг Америка жамоатчилиги, ишбилармон ва академик доираларини Орол денгизи зонасидаги экологик вазият, Ўзбекистон раҳбарияти томонидан экологик фалокатнинг салбий оқибатларини юмшатиш бўйича олиб борилаётган ишлар тўғрисида хабардор қилишга қаратилган.
Иштирокчиларнинг фикрича, Орол денгизи экотизимини тиклаш ва сув ресурсларидан оқилона фойдаланиш Марказий Осиёнинг барқарор тараққиёти ва атроф-муҳитни муҳофаза қилишга кўмаклашади. Бу борада Марказий Осиё мамлакатлари, балки бутун дунё ҳамжамиятининг саъй-ҳаракатларини бирлаштириш зарурлиги таъкидланди.
Тадбир доирасида Владимир Норовнинг Project C.U.R.E. президенти Дуглас Жексон билан учрашуви бўлиб ўтди. Мулоқот чоғида навбатдаги гуманитар юкларни Ўзбекистонга етказиб бериш ва ҳамкорликни кенгайтириш масалалари муҳокама қилинди. Project C.U.R.E. Оролбўйи минтақасидаги вазиятни яхшилашга қаратилган саъй-ҳаракатларни қўллаб-қувватлаш учун АҚШдан донорларни жалб қилиш бўйича саъй-ҳаракатларни давом эттиришга тайёрлиги маълум қилинди.
«Молиялаштиришни ўрганаётган кўнгиллиларимиз навбатдаги гуманитар ёрдам контейнерларини этказиб бериш учун маблағ йиғишда давом этмоқдалар», — деган Дуглас Жексон.
Project C.U.R.E. раҳбари билан музокаралар якунида Ўзбекистон эҳтиёжлари учун тиббий буюмлар билан 1,5 миллион долларлик янги контейнер жўнатишга келишиб олинди.
Эслатиб ўтамиз, илгари Қорақалпоғистонга 3 миллион долларлик тиббий асбоб-ускуналар ва соғлиқни сақлаш буюмлари етказиб берилган эди. 2022 йил июлида Қорақалпоғистон тиббиёт муассасаларига берилган 2,9 минг дона тиббий буюмларни ўз ичига олган умумий оғирлиги 16,8 тонна бўлган яна тўртта контейнер етказиб бериш ташкил этилди.
Изоҳ (0)