Qashqadaryo viloyati Mirishkor tumani hokimi o‘rinbosari fuqaroga yer olib berish uchun 50 ming dollar pora olgan vaqtda ushlangani xabar qilingandi. Nasafnews’ning ma’lum qilishicha, unga nisbatan sud hukmi o‘qildi.
Qayd etilishicha, shu yilning 4-avgust kuni jinoyat ishlari bo‘yicha Qarshi tuman sudi binosida ochiq sud majlisi o‘tkazilgan. Sudda sudlanuvchi U.Y. Qashqadaryo viloyat Ichki ishlar boshqarmasi boshlig‘ining o‘rinbosari, Huquqbuzarliklar profilaktikasi boshqarmasi boshlig‘i lavozimidan Mirishkor tumani hokimi o‘rinbosari, Mahalla va oilani qo‘llab-quvvatlash bo‘limi boshlig‘i lavozimiga tayinlangani aytilgan va u muqaddam ichki ishlar organlarida ishlaganida Muborak tuman IIB boshlig‘i X.B. bilan jinoiy til biriktirgani ma’lum bo‘lgan.
Fuqarolar J.E. va O.A. chorvachilik klasterini tashkil qilish uchun Mirishkor tumani hududidan ming gektar yer maydoni ajratilishida yordam berishni so‘rab, Mirishkor tuman hokimligiga murojaat qilgan. O‘rinbosar Mirishkor tuman hududidan 500 gektar yer ajratib berishga yordam berishini aytib, buning evaziga 40 ming dollari miqdorida, qolgan 500 gektar yer maydonini jinoiy sherigi X.B. orqali Muborak tumani “Muborak” MFY hududida joylashgan jazoni ijro etish koloniyasiga tegishli bo‘lgan yer maydoni hududidan olib berishini va’da qilgan. Buning evaziga yana 40 ming dollar, jami 1000 gektar yer maydoni olib berishi evaziga 80 ming dollar miqdorida pul mablag‘i berishini talab qilgani aniqlangan.
Sud hukmiga ko‘ra, U.Y. Jinoyat kodeksining 25,168-moddasi (firibgarlik jinoyatiga tayyorgarlik ko‘rish va jinoyat sodir etishga suiqasd qilish) 4-qismining “a” bandi va 28,211-moddasi (pora berish) 3- qismining “a” bandida ko‘rsatilgan jinoyatlarni sodir qilganlikda aybli deb topilgan.
Unga nisbatan 2 yil muddatga mansabdorlik va moddiy javobgarlik lavozimlarida ishlash huquqidan mahrum qilib, bazaviy hisoblash miqdorining 400 baravari miqdorida, 108 million so‘m jarima jazosi va 7 yil muddatga ozodlikdan mahrum qilish jazosi tayinlangan.
Ayblanuvchining sherigi, Muborak tumani IIBning sobiq boshlig‘i X.B.ga 2 yil muddatga mansabdorlik va moddiy javobgarlik lavozimlarida ishlash huquqidan mahrum qilib, bazaviy hisoblash miqdorining 213 baravari miqdorida, 57 million 510 ming so‘m jarima jazosi tayinlangan.
Izoh (0)