«Дарё» кундалигида 9 декабрда содир бўлган энг муҳим воқеалар

«Дарё» нашри 9 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.

Путин Украина энергетика объектларига зарбалар ҳақида гапирди

Россия президенти Владимир Путин «Олтин юлдуз» медаллари билан тақдирлаш маросими иштирокчилари билан мулоқот қилаётиб,

Украина энергетика объектларига ракета зарбалари ҳақида шундай баёнот билан чиқди:«Ҳозир бизнинг қўшни мамлакат энергетика инфратузилмасига зарбаларимиз борасида шов-шув кўп бўляпти. Ҳа, биз буни қиляпмиз. Лекин ким бошлади? Қрим кўпригига ким зарба берди, Курск атом электр станциясидан электр узатиш симини ким узди, Донецкда ким сувни тўсиб қўйди? Бир миллион аҳоли яшайдиган шаҳарда сув бермаслик — геноцидлик ҳаракати.

Ҳеч ким бу ҳақда ҳеч қаерда айтмади. Бутунлай жимжитлик. Биз бунга жавобан нимадир қилсак, шов-шув оламни босиб кетади. Бу бизга жанговар вазифаларни амалга оширишда халал бермайди», — деди Путин.

Октябрь бошидан буён Россия Мудофаа вазирлиги Украина ҳудудига оммавий ракета зарбалари орқали, ҳарбий ва энергетика объектларига зарар бермоқда, шунингдек, ноҳарбий инфратузилмага ҳам дахл қилинган. Оқибатда Украинанинг барча йирик ИЭС ва ГЭСлари зарар кўрган.

Украиналикларга қуёш батареяларидан иборат 100 та тўплам юборилади

Coopdead жамоатчилик ташкилоти украиналикларга электр узилишларига қарши курашда ёрдам бериш учун келаси ойгача Франциядан Украинага қуёш батареяларининг 100 та тўпламини юборишини маълум қилди. Бу ҳақда France Bleu хабар бермоқда.

«Тўплам телефонлар, компьютерлар, принтерларнинг ишлаши ёки интернетга кириш учун зарур қуёш панелларидан иборат пластик қути кўринишида юборилади», — деди ташкилот президенти Антонин Ақвароне.

Ташкилот батареяларнинг биринчи партияси мактаблар ва шифохоналарга топширилишини қўшимча қилди.Қайд этилишича, айни дамда ташкилот маблағ изламоқда — бундай тўпламларнинг ҳар бири 3500 евро туради.

Эслатиб ўтамиз, 8 декабрь куни Украинага Франциядан 100 та генератор етиб келган.Бунинг сабаби, 7 декабрь куни «Киев электр тармоқлари» компанияси яна Украина пойтахтида электр энергиясининг фавқулодда узилишлари ҳақида хабар берган.

Греция ва Туркия можароси нега қайта кўтарилмоқда?

Туркия ташқи ишлар вазири Эгей денгизидаги ҳарбий машғулотлар юзасидан Грецияга қарши «чора кўриш» билан таҳдид қилди. Греция ТИВ эса бунга муносабат билдирди. Бу ҳақда Associated Press хабар берди.

Баёнотга кўра, Туркиянинг «такрорий уруш таҳдидлари»ни қабул қилиб бўлмайди, Греция халқаро ҳуқуқ ва Бирлашган Миллатлар Ташкилотининг денгиз қонунини ҳурмат қилади. Туркия Эгей денгизининг шарқий қисмидаги Греция оролларига аскар ёки қурол-яроғ жойлаштирилиши халқаро ҳуқуққа мувофиқ ноҳарбий мақомга зид эканини таъкидламоқда.Греция эса эътироз билдириб, Туркиянинг эҳтимолий ҳужумидан уларни ҳимоя қилиши кераклигини, жумладан, Туркия ороллар қаршисида муҳим ҳарбий кучга эгалигини қайд этган.

6 декабрь куни Туркия ташқи ишлар вазири Мевлут Чавушўғли Греция ўз қонунбузарлигидан воз кечиши кераклигини айтган.«Ёки у бу масалада орқага чекинади ва келишувга амал қилади, ёки биз нима керак бўлса, амалга оширамиз», — деган эди сиёсатчи.Туркия ва Греция ўнлаб йиллар давомида бир қатор масалалар, жумладан, Эгей денгизидаги ҳудудий даъволар ва ҳаво ҳудуди юзасидан баҳслашиб келади. Ўтган 50 йил ичида бу тортишувлар уларни уч марта уруш ёқасига олиб келган.Аввалроқ АҚШ сенатори Роберт Менендес Туркия НАТО иттифоқчиси бўлишига қарамай, Эгей денгизида провокацион парвозлар билан Греция суверенитетига қарши чиқаётганини айтганди

Ташқи меҳнат миграцияси агентлиги Россиядаги ўзбекистонликларни огоҳлантиради

Ижтимоий тармоқларда Москва жамоат транспортида Россия Қуролли кучларида хизмат қилишга чақирувчи ўзбек тилида берилган эълон сурати тарқалмоқда.Унда Россия Қуролли Кучларида шартнома бўйича ҳарбий хизматга кирганлар мамлакат президенти фармонига мувофиқ, соддалаштирилган тартибда Россия фуқаролигини олиши мумкинлиги айтилган.

Тармоқ фойдаланувчиларининг ёзишича, ушбу таблодаги ёзувлар ўзбек тилидан ташқари кетма-кет тожик, қирғиз тилларида ҳам чиқади.

Шу муносабат билан Ўзбекистон Ташқи меҳнат миграцияси Россия Федерацияси ҳудудида вақтинча меҳнат фаолиятини амалга ошираётган Ўзбекистон фуқароларидан Россия ва Украина ўртасидаги зиддиятли ҳудудларга жалб қилиш ҳақидаги даъватларга эргашмасликни, зиддиятли ҳудудларга бормасликни ва ҳарбий ҳаракатларда иштирок этмасликни сўраб огоҳликка чақирган.Эслатиб ўтамиз, Ўзбекистон Жиноят кодексининг 154-1-моддасида чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга ёлланиш 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланиши кўзда тутилган.