Шавкат Мирзиёев 28 ноябрь куни «Кўчмас мулкка бўлган ҳуқуқларни давлат рўйхатидан ўтказиш тўғрисида»ги қонунни имзолади.
Адлия вазирлигининг «Ҳуқуқий ахборот» каналининг маълум қилишича, ушбу қонун кўчмас мулкнинг қуйидаги турлари: ер участкаларига, биноларга, иншоотларга, шу жумладан қурилиши тугалланмаган объектларга, кўп йиллик дов-дарахтларга, мулкий мажмуа сифатидаги корхонага бўлган ҳуқуқларни давлат рўйхатидан ўтказишга нисбатан татбиқ этилади.
Кўчмас мулкка бўлган қуйидаги ҳуқуқлар ёки чекловлар давлат рўйхатидан ўтказилиши лозим:
- мулк ҳуқуқи;
- доимий эгалик қилиш ҳуқуқи;
- доимий фойдаланиш ҳуқуқи;
- мерос қилиб қолдириладиган умрбод эгалик қилиш ҳуқуқи;
- ижара ҳуқуқи;
- иккиламчи ижара ҳуқуқи;
- хўжалик юритиш ҳуқуқи;
- оператив бошқариш ҳуқуқи;
- кўчмас мулкни ишончли бошқариш ҳуқуқи;
- бепул фойдаланиш ҳуқуқи;
- рента;
- ипотека;
- сервитут;
- кўчмас мулкка бўлган ҳуқуқларга қўйилган чекловлар.
Кўчмас мулкнинг кадастр йиғмажилдини шакллантириш учун қуйидагилар асос бўлади:
- ер участкаларининг белгиланганлиги (реализация қилинганлиги);
- бинонинг, иншоотнинг қурилганлиги ва фойдаланишга топширилганлиги;
- белгиланган тартибда ажратилган ер участкасида қурилиши тугалланмаган объектнинг мавжудлиги;
- кўчмас мулкнинг бўлинганлиги;
- кўчмас мулкнинг бирлаштирилганлиги.
Ушбу қонун расмий эълон қилинган кундан эътиборан уч ой ўтгач кучга киради.
Эслатиб ўтамиз, Шавкат Мирзиёев 2019 йилнинг апрелида кўчмас мулкка бўлган ҳуқуқларни давлат рўйхатидан ўтказиш тизимини такомиллаштириш тўғрисидаги қарорни имзолаганди.
Изоҳ (0)