Арманистон ташқи ишлар вазири Арарат Мирзоян Ереван Озарбайжоннинг тинчлик шартномаси бўйича жавобини олганини маълум қилди. Бу ҳақда Armenpress агентлиги хабар берди.
«Биз Озарбайжонга муносабатларни нормаллаштириш бўйича ўз таклифларимизни ёки тинчлик шартномаси лойиҳасини тақдим этдик. Уларнинг жавобини эса 27 ноябрь куни олдик», — дейди Мирзоян.
Унинг таъкидлашича, муҳокамалар давом этмоқда ва Арманистон имкон қадар тезроқ консенсусга эришишга умид қилмоқда. Бу жараёнда халқаро ҳамкорларнинг воситачилик саъй-ҳаракатлари ҳам муҳим рол ўйнаши мумкин.
Расмий Ереван музокараларни давом эттириш бўйича келишувларга содиқ эканини таъкидлади. У октябр ойи бошида Прагада бўлиб ўтган музокаралар чоғида Озарбайжон томони билан навбатдаги учрашувни ўтказиш бўйича келишувга эришилганини қўшимча қилди.
Таклифлар 7 ноябрь куни икки давлат ташқи ишлар вазирларининг Вашингтондаги учрашувида киритилди. 25 ноябрь куни Арманистон Ташқи ишлар вазирлиги матбуот котиби Ваан Унанян Ереван ҳали Бокудан жавоб олмаганини айтди.
Мирзоян, шунингдек, Арманистон уч томонлама келишувлар ва халқаро ҳуқуқлар бўйича бундай мажбуриятлар бўлмаганига қарамай, ўзида мавжуд бўлган барча мина майдонлари хариталарини бир томонлама тартибда Озарбайжонга топширганини таъкидлади. Мазкур хариталарни очишда ёрдам беришга тайёрлигини билдирди.
Октябрь ойида Россия президенти Владимир Путин ва Арманистон бош вазири Никол Пашинян учрашиб, Қорабоғдаги вазиятни муҳокама қилганди.
Изоҳ (0)