Наманган вилояти Чортоқ туманида вояга етмаган шахс автомашинани олиб қочиб, йўл-транспорт ҳодисасига учради. Бу ҳақда Тергов департаменти ахборот хизмати хабар берди.
Келтирилишича, 21 ноябрь куни Чортоқ туманида яшовчи 29 ёшли А.О. туман ИИБга ариза билан мурожаат қилган. Унда шу куни соат 02:30 да номаълум шахс унинг хонадони олдида бўлган Nexia-2 автомашинасини қаровсиз қолдирилганидан фойдаланиб, олиб қочиб кетилганини билдирган.
Олиб борилган тезкор-қидирув ишлар натижасида жабрланувчига тегишли бўлган Nexia-2 номаълум шахс томонидан Поп тумани «Қўшминор» МФЙдан ўтувчи А-373 Тошкент–Ўш автомобиль йўлида дастлаб йўл четидаги бетон устунга урилиб, сўнгра пастликка тушиб кетган ҳолда топилган.
Мазкур жиноятни содир этган шахсга дастлаб биринчи тез-тиббий ёрдам кўрсатилиб, шахсига ойдинлик киритилганда у муқаддам судланган, Чартоқ туманида яшовчи вояга етмаган 16 ёшли М.А. экани аниқланган.
Ҳолат юзасидан Чортоқ тумани ИИБ ҳузуридаги тергов бўлинмаси томонидан М.А.га нисбатан Жиноят кодекснинг 267-моддаси 1-қисми (транспорт воситасини олиб қочиш) билан жиноят иши қўзғатилиб, ҳайдовчига жиддий шикаст етмагани сабабли унга нисбатан қамоққа олиш тарздаги эҳтиёт чораси қўлланган. Ҳозирда тергов ҳаракатлари олиб борилмоқда.
Мавзуга доир:
Изоҳ (0)