Шавкат Мирзиёев Навоий вилоятини республиканинг намунавий ҳудудига айлантириш бўйича янги ташаббусларни илгари сурди, деб хабар бермоқда «Дарё» мухбири.
Давлат раҳбари халқ депутатлари вилоят кенгаши йиғилишида ушбу ташаббусни келтириб ўтди.
Биринчи ташаббус — вилоят электр энергиясини тежаш бўйича намуна бўлади. Бунинг учун барча ташкилотларга 100 фоиз қуёш панеллари ўрнатилади. Барча сув насосларини самарали ишлатиш тизими йўлга қўйилади.
Иккинчи ташаббус — «Яшил макон» лойиҳасини амалга оширишда вилоят намунавий ҳудудга айлантирилади.
Бунинг учун:
- барча фермерлар томонидан дала четларига тут ва узум экиш тизими йўлга қўйилади;
- вилоятнинг 330 маҳалласи ва хонадонларда райҳон ва ялпиз экиш, қайта ишлаш ва сотиш намунавий тизими яратилади.
Учинчи ташаббус — яйловларни ишга солиш орқали эчкичилик ва қўйчиликни кескин ривожлантириш. Вилоятга 200-300 минг бош эчки ва қўй олиб келинади ва алоҳида дастур ишлаб чиқилади.
Тўртинчи ташаббус — вилоятда инфратузилма объектлари қурилишида ресурсларни 30 фоизгача тежаш намунаси. Ушбу ташаббусни амалга оширишга, коррупциясиз шаффоф тизим яратишга вилоят прокурори масъул бўлади. Сектор раҳбарлари бу тизимни ишлатади.
Янги ҳоким ва барча сектор раҳбарларига ушбу ташаббусларни амалга ошириш орқали бир йил давомида вилоятни ишсизлик ва камбағаллик тўлиқ бартараф этилган ҳудудга айлантириш юзасидан топшириқлар берди.
Йиғилиш якунида давлат раҳбари Навоий аҳлига эзгу тилакларини билдириб, барчага янги муваффақиятлар тилади.
Мавзуга доир: Навоийга 2023 йилда ижтимоий муаммоларни ҳал этишга қўшимча 655 миллиард сўм ажратилади
Изоҳ (0)