2023 йилда асосий озиқ-овқат товарлари бўйича жаҳон нархлари нисбатан пастроқ шаклланиши кутилмоқда. Бу ҳақда Ўзбекистон Марказий банки пул-кредит сиёсатининг келаси 3 йиллик даврига мўлжалланган прогнозларида маълум қилди.
Қайд этилишича, жаҳон бозорларида асосий озиқ-овқатлар нархлари бўйича кутилмалар пасаювчи тенденция намоён этмоқда.
2020 йилда ўзининг энг юқори нуқтасига чиққан транспорт ва логистика хизматлари нархлари босқичма-босқич пасайиб бориши оқибатида 2023 йилда асосий озиқ-овқат товарлари бўйича жаҳон нархлари нисбатан пастроқ шаклланиши кутилмоқда. Бирлашган миллатлар ташкилотининг озиқ-овқат ва қишлоқ хўжалиги маҳсулотлари нархларини ўзида ифодаловчи FAO индекси 2023 йилда 120-130 бандгача пасайиши (жорий йил сентябр ҳолатига 137 бандни ташкил қилган) бўйича прогнозлар юзага келган. Хорижий марказий банклар томонидан кўрилаётган чоралар билан биргаликда асосий озиқ-овқат нархларининг пасаювчи трендлари кейинги йилда глобал инфляцион жараёнларнинг юмшаб боришига ҳисса қўшади.Марказий банкка кўра, Ўзбекистонда келаси йилда озиқ-овқат маҳсулотлари импортидаги юқори улуш сақланиб қолиши кутилмоқда.
Жорий йилда юзага келган кескин ташқи вазият шароитида Ўзбекистон экспорти таркибида реекспорт операциялари ҳам ўрин олди. Кейинги йилда ушбу тенденциянинг давом этиши ҳам экспорт, ҳам импорт ҳажмларига таъсир кўрсатувчи омиллардан бўлади. Иқтисодий фаолликнинг сақланиб қолаётганлиги ва хусусий сектордаги ўсиш суръатларини инобатга олиб, 2023 йилда импорт ҳажми 14-15 фоиз, 2024 йилда 12-14 фоиз ва 2025 йилда 8-10 фоиз атрофида ўсиб бориши баҳоланмоқда. Импорт таркибида кимё маҳсулотлари, машина ва ускуналар импорти ва озиқ-овқат маҳсулотлари импортининг нисбатан юқори улушлари сақланиб қолиши кутилмоқда.Аввалроқ Халқаро валюта жамғармаси 2023 йилда Ўзбекистонда иқтисодий ўсиш секинлашиши ва инфляция пасайишини прогноз қилганди.
Изоҳ (0)