Айни вақтда Навоий шаҳрида президент Шавкат Мирзиёев иштирокида халқ депутатлари вилоят кенгаши йиғилиши бўлиб ўтмоқда. Бу ҳақда «Дарё» мухбири хабар берди.
Президент бугун кун давомида Навоий вилоятида бўлишини айтиб, ёшлар билан ҳам учрашишини айтди.
«Нима учун мен ҳамиша ёшлар билан учрашаман? Чунки улар эртангги келажагимиз. Бугун биз уларга кўпроқ эътибор бермасак, уларни иш билан таъминламасак эртага хавф-хатар кўпаяди. Бугун ташкилий масала билан бирга ўзаро мулоқот ҳам қиламиз. Навоий кўпмиллатли вилоятлардан бири. Бугунги учрашувимиздан мен ҳам рози бўлиб кетишим керак, сизлар ҳам рози бўлишинглар керак. Навоийдаги барча маҳалланинг дардини баралла айтишимиз керак. Ҳозир ҳамма нарсани бамаслаҳат қилсак, ҳамма муаммони ечса бўлади», — деди давлат раҳбари.
Шавкат Мирзиёев, шунингдек, пахта сиёсати ҳақида ҳам сўз юритди.
«Бош вазир бўлиб ишлаганимизда Навоий вилоятида кечаси билан пахта бўйича йиғилишлар ўтказардик. Мана ҳозир пахтани ҳам, ғаллани ҳам таннархини оширдик, бу барча учун манфаатли бўлди. Агар биз халқимизга манфаат қилиб берсак, улар қилишади. Бизнинг халқимиздан меҳнаткашроқ халқ йўқ», — деди президент.
Изоҳ (0)