2022 йилдаги иқтисодий ҳамкорлик натижалари ва Евросиё иқтисодий иттифоқи (ЕОИИ) доирасида савдо алоқаси таҳлил қилинди. Бу ҳақда Иқтисодий тадқиқотлар ва ислоҳотлар маркази хабар бермоқда.
Ўзбекистоннинг Евросиё иқтисодий иттифоқига аъзо давлатлар билан январь—октябрь ойларида ташқи савдо айланмаси 12,6 млрд долларни ёки 24,6 фоизни ташкил этди.
Шундан экспорт ҳажми 4,5 млрд доллар, импорт ҳажми эса 8,1 млрд долларга етган.
Ўзбекистоннинг умумий ташқи савдо айланмасида ЕОИИ давлатларининг улуши 31,4 фоизни, жами экспорт — 29,1 фоизни, жами импорт — 32,9 фоизни ташкил этди.
2022 йилнинг январь—октябрь ойлари якунида Ўзбекистоннинг ЕОИИ давлатлари билан ташқи савдо ҳажмидаги улуши:
Россия билан ташқи савдо айланмаси 7,5 млрд долларни (Ўзбекистоннинг ЕОИИ мамлакатлари билан ташқи савдо айланмасининг 59 фоизи) ёки 27,1 фоизни ташкил этди:
- экспорт — 2,5 млрд доллар;
- импорт — 5 млрд доллар.
Қозоғистон билан ташқи савдо айланмаси 3,7 млрд долларни (30 фоиз) ёки 17,7 фоизни ташкил этди:
- экспорт — 1,1 млрд доллар;
- импорт — 2,6 млрд доллар.
Қирғизистон билан ташқи савдо айланмаси 990 млн долларни (8 фоиз) ёки 28 фоизни ташкил этди:
- экспорт — 773 млн доллар;
- импорт — 217 млн доллар.
Беларусь билан ташқи савдо айланмаси 420 млн долларни (3 фоиз) ёки 38,5 фоизни ташкил этди:
- экспорт — 94 млн доллар;
- импорт — 326 млн доллар.
Ўзбекистон 2020 йилнинг декабрида Евросиё иқтисодий иттифоқида кузатувчи мақомини олди.
Айнан шу уюшма билан энг яқин савдо-иқтисодий алоқалар йўлга қўйилиб, ЕОИИ билан янада интеграциялашув уларни янада мустаҳкамлаш имконини беради.
Евросиё иқтисодий иттифоқи мамлакатларининг 2020 йилда Ўзбекистон билан савдо айланмаси қарийб 10 миллиард долларни ташкил этди. ЕОИИ мамлакатларининг улуши Ўзбекистон умумий товар экспортининг 30-31 фоизини ташкил этади.
Ўзбекистон 2019 йилда умумий қиймати 9,42 миллиард долларлик маҳсулот экспорт қилди, шундан 2,83 миллиард долларлик маҳсулот ЕОИИ ҳудудига етказиб берилди.
ИTСВ маълумотларига кўра, Ўзбекистон ва ЕОИИ мамлакатлари ўртасидаги савдо айланмаси тўрт йилда 75 фоизга ошган.
Анъанага кўра, Ўзбекистон тўқимачилик, металлургия ва кимё саноати маҳсулотлари, шунингдек, озиқ-овқат, биринчи навбатда, мева-сабзавот маҳсулотларини экспорт қилади.
Мамлакатда қурилиш материаллари, ёғочни қайта ишлаш ва кимё саноати маҳсулотлари, шунингдек, қайта ишланган озиқ-овқат маҳсулотлари, жумладан, сут ва гўшт маҳсулотлари ЕОИИдан олинади.
ЕОИИга янада интеграциялашган ҳолда Ўзбекистон ташқи бозорларга чиқишда, хусусан Ветнам, Эрон, Сербия ва Сингапур билан савдо қилишда янада қулай шароитларга эга бўлади.
Изоҳ (0)