Сўнгги 5 йилдаги Ўзбекистон—Франция муносабатлари таҳлил қилинди

Франция Ўзбекистоннинг Европа Иттифоқида муҳим ҳамкорларидан биридир. Иқтисодий тадқиқотлар ва ислоҳотлар маркази сўнгги 5 йил Ўзбекистон—Франция муносабатларини таҳлил қилди.

Ўзбекистон ва Европа Иттифоқи ўртасидаги шериклик ва ҳамкорлик тўғрисидаги битим»га мувофиқ, Ўзбекистоннинг Франция билан ўзаро савдосида энг қулай имтиёзли режими ўрнатилган.

Бундан ташқари, 2021 йилнинг апрель ойида Ўзбекистон Европа Иттифоқининг «Преференциялар бош тизими» (GSP+) бўйича бенефициар давлатига айланди.

Бу эса Европа Иттифоқига, хусусан Францияга, ўзбек маҳсулотларини, жумладан, 6,2 мингта муҳим экспорт товарларини божсиз олиб кириш имконини беради.

Буларнинг натижасида 2022 йилнинг январь—сентябрь ойлари давомида Ўзбекистон ва Франция ўртасидаги товар айирбошлаш ўтган йилнинг шу даврига нисбатан 5,6 фоизга ўсиб, 219,8 млн доллардан 232,2 млн долларгача етди.

Экспорт ҳажми 9 баробарга ошиб 7,7 млн доллардан 69,6 млн долларга ўсди. Импорт эса мос равишда 212,1 млн доллардан 162,5 млн долларгача яъни 23,4 фоизга камайди, салбий салдо 204,4 млн доллардан 92,9 млн долларгача қисқарди.

Франциядан ўзлаштирилган инвестициялар

2017 йилдан бошлаб ҳозирги кунга қадар Ўзбекистондаги француз капитали иштирокидаги корхоналар сони 3,5 баробарга ўсиб 13 тадан 46 тагача кўпайди (26 таси қўшма ва 20 таси 100 фоизлик француз корхоналари).

2021 йилнинг якунига кўра, Франциядан ўзлаштирилган инвестициялар ва кредитлар ҳажми 297,1 миллион долларни, шу жумладан тўғридан-тўғри хорижий инвестициялар — 70,9 миллион доллар ва кредитлар — 226,2 миллион долларни ташкил этди.

2022 йилнинг биринчи ярмида эса 92,8 миллион доллар Франция инвестициялари ўзлаштирилди.

Франция тараққиёт агентлиги билан ҳамкорлик доирасида энергетика, сув таъминоти, чорвачилик, туризм инфратузилмаси ва бошқа соҳаларда қатор йирик лойиҳалар мавжуд.

Тўқимачилик саноатидаги ҳамкорлик ўзаро манфаатларнинг кенг доирасини акс эттиради. Бугунги кунда «Ўзбектекстилсаноат» компанияси француз томони билан биргаликда ушбу йўналишда ишлаб чиқариш лойиҳалари амалга оширилиб, қўшма корхоналар ташкил этилмоқда.

Икки томонлама ҳамкорлик қишлоқ хўжалиги маҳсулотларини қайта ишлаш, боғдорчилик ҳамда уруғчилик, ўсимликлар карантини, маҳсулотлар хавфсизлиги ва сақланишини таъминлаш соҳаларида қўшма илмий изланишларни амалга ошириш каби йўналишларда ҳам муваффақиятли ривожланмоқда.

Франция машинасозлик, энергетика, кимё саноати, (жумладан, парфюмерия ва фармацевтика саноати), қишлоқ хўжалиги, (хусусан, виночилик), қурилиш материаллари ишлаб чиқариш, шунингдек, туризм ва илм-фан каби соҳаларда жаҳонда етакчи мавқега эга.

Франция билан ҳамкорлик эса Ўзбекистон иқтисодиётининг кўплаб тармоқлари учун ижобий таъсир кўсатади.

Аввалроқ Шавкат Мирзиёев Францияга жўнаб кетгани ҳақида хабар берилганди.