Маск сўровномадан кейин Трампнинг Twitter аккаунтини тиклади

АҚШ собиқ президенти Дональд Трампнинг 2021 йилда блокланган Twitter аккаунти тикланади, деб эълон қилди ижтимоий тармоқнинг янги эгаси Илон Маск. Ушбу твитдан ҳеч қанча ўтмай Трампнинг ижтимоий тармоқдаги профили яна фаоллашди ва бир соатдан камроқ вақт ичида обуначилари сони 500 мингдан 1 миллионга кўтарилди.

19 ноябрь куни Маскнинг Twitter’даги аккаунтида Трамп саҳифасини блокдан чиқариш-чиқармаслик бўйича сўровнома ўтказилди, иштирокчиларнинг 52 фоизи буни ёқлаб овоз берди.

Сўровномада 15 миллиондан ортиқ фойдаланувчи овоз берди, 134 миллион киши уни кўрди, деди Маск. Шунингдек, сўровнома остида тадбиркор лотинча Voz Populi, Vox Dei – «Халқ овози – Худонинг овози» ибораси билан твит қолдирди.

Reuters хабар беришича, Трампнинг ўзи ижтимоий тармоққа қайтиш учун «ҳеч қандай сабаб» кўрмаган.

2021 йилнинг январида Трамп тарафдорларининг Капитолийга ҳужумидан кейин Twitter «зўравонликка ундаш хавфи туфайли» унинг аккаунтини бутунлай блоклаб қўйган эди. Унинг 90 миллионга яқин обуначиси бўлган. Ўша пайтдаги АҚШ раҳбари блокировкани мамлакат учун «бутунлай шармандалик» деб атаган ва «радикал чап қанот аҳмоқлари ҳақиқатдан қўрқади», деб сўз эркинлиги йўқотилганини таъкидлаган.