Тошкентда Captiva машинасида 100 граммдан ортиқ гашиш олиб кетилаётгани аниқланди
Тошкент шаҳри божхона бошқармасининг хабар қилишича, фуқаронинг Captiva машинасидан 100 граммдан ортиқ гашиш топилди.
Хабарга кўра, гиёҳвандлик воситалари ноқонуний айланувининг олдини олиш борасида божхона органлари томонидан тизимли чора-тадбирлар олиб борилмоқда. Божхона бошқармасининг контрабандага қарши курашиш бўлими ходимлари томонидан Давлат хавфсизлик хизмати ходимлари билан ҳамкорликда пойтахтнинг Бектемир туманида навбатдаги тезкор тадбир ўтказилган.
Тезкор тадбир давомида Captiva автотранспорт воситаси тўхтатилиб, белгиланган тартибда кўздан кечирилиши натижасида транспорт воситасида оғирлиги 103,04 граммни ташкил қилувчи гашиш гиёҳвандлик воситаси яширилгани фош бўлди.
Ҳозирда ҳолат юзасидан терговга қадар текширув ҳаракатлари давом эттирилмоқда.
