Бокс. Лазизбек Муллажонов ҳиндистонлик рақибини мағлуб этиб, Осиё чемпионати финалига чиқди

Иорданиянинг Амман шаҳрида бокс бўйича Осиё чемпионатининг ярим финал баҳслари 10 ноябрь, пайшанба куни бўлиб ўтмоқда.

Супер оғир вазн тоифасида (+92 кг) Ўзбекистон шарафини ҳимоя қилаётган Лазизбек Муллажонов ярим финалда Ҳиндистон вакили Нарендерга қарши рингга чиқди.

Жангда Муллажонов тўлиқ устунликка эришди ва якунда 5:0 ҳисобида ғалаба қозониб, финал йўлланмасига эга чиқди.

Финалда ўзбекистонлик боксчи қозоғистонлик машҳур чарм қўлқоп устаси Камшибек Кункабаевга қарши жанг қилади.

Аввалроқ Саиджамшид Жаъфаров финалга йўл олган, Шаҳзод Музаффаров, Атҳамжон Муҳиддинов ва Асадхўжа Мўйдинхўжаев ярим финалда енгилиб, бронза медалига эга чиққани хабар қилинганди.

10 ноябрь куни яна қуйидаги боксчилар ўз жангини ўтказади:

• -51 кг: Ҳасанбой Дўстматов — Ҳаркҳуу Энҳмандаҳ (Мўғулистон) (20:10 дан сўнг)
• -57 кг: Абдумалик Ҳалоков — Гантумур Лундаа (Мўғулистон) (20:45 дан сўнг)
• -63,5 кг: Руслан Абдуллаев — Чу Эн Лаи (Хитой Тайпейи) (21:00 дан сўнг)
• -80 кг: Одилжон Аслонов — Омурбек Бекжигит улуу (Қирғизистон) (22:00 дан сўнг)
• -92 кг: Мадиёр Саидраҳимов — Аҳмат Сулайман (Иордания) (22:30 дан сўнг)