Бухорода бир неча бор огоҳлантирилган бўлишига қарамай, алимент тўлашдан бўйин товлаган ота 15 суткага қамалди. Бу ҳақда МИБ ахборот хизмати хабар берди.
Қайд этилишича, бюронинг Бухоро шаҳри бўлими иш юритувида фуқаролик ишлари бўйича Бухоро туманлараро судининг 2014 йилдаги ижро варақасига асосан қарздор А.Б.дан ундирувчи О.Ш. фойдасига вояга етмаган фарзандлари моддий таъминоти учун қарздорнинг иш ҳақи ва бошқа даромадининг 1/2 қисм миқдорида алимент ундириш тўғрисидаги ижро ҳужжати мавжуд.
Ижро ҳаракатлари давомида қарздор бир неча бор огоҳлантирилган бўлишига қарамасдан, ижро ҳужжати талабларини бажаришдан бўйин товлаб, 32 миллион сўмдан ортиқ алимент тўловларини тўламасдан келгани сабабли унга нисбатан тегишли ҳужжатлар расмийлаштирилиб, мазмунан кўриб чиқиш учун жиноят ишлари бўйича Бухоро шаҳри судига юборилган.
Мазкур суд томонидан 1 ноябрь куни қарздор отага нисбатан тўпланган маъмурий иш ҳужжатлари очиқ суд мажлисида кўриб чиқилган. Қарздорнинг айби, ўз айбига иқрорлик ва қилмишидан пушаймон бўлиб берган кўрсатувидан ташқари, тушунтириш хатлари, маъмурий баённома ва ишда тўпланган бошқа ёзма далиллар билан ўз исботини топди.
Суд Маъмурий жавобгарлик тўғрисидаги кодекснинг 474-моддасига асосан қарздорга нисбатан 15 сутка маъмурий қамоқ жазоси тайинлади. Қарздор ота суд залида дарҳол қамоққа олиниб, жазони ўташ учун махсус муассасага жойлаштирилди.
Изоҳ (0)