«Ливерпуль» футбол клуби сотувга қўйилди

Американинг Fenway Sports Group (FSG) компанияси «Ливерпуль» футбол клубини сотувга қўйди.

The Athletic хабарига кўра, клуб ҳақиқатда сотиладими ёки йўқ номаълум, бироқ FSG таклифларни кўриб чиқишга тайёр.

Компания клуб ҳақида маълумотлар жамланган видеотақдимотни тайёрлаб қўйган ва уни потенциал харидорларга юборишга тайёр. Келишувни амалга оширишда Goldman Sachs ва Morgan Stanley банклари ёрдам беради.

Хабарларга кўра, Европа Суперлигаси ғоясининг барбор бўлиши ва «Челси»нинг 4,25 миллиард фунтга сотилгани FSG компаниясининг шу қарорга келиши сабаб бўлган. Компания «Ливерпуль» сотувидан 4 миллиард фунт ишлаб олишни мўлжал қилган.

FSG «Ливерпуль»ни 2010 йилнинг октябрида 300 миллион фунтга сотиб олганди. Ушбу таъсисчи бошқаруви остида жамоага Юрген Клопп олиб келинди, клуб эса 30 йил деганда илк бор Англия чемпионига айланди, шунингдек, Чемпионлар Лигаси, Англия Кубоги ва Лига Кубогида бош совринга эга чиқди.

Компания «Энфилд»да қайта таъмирлаш ишларини амалга оширмоқда. Ишлар келаси йилнинг ёзига қадар тугаши айтилмоқда. Таъмирлаш натижасида стадион сиғими 61 минггача етади. Бундан ташқари FSG даврида «Ливерпуль» янги базага эга бўлди.