Организмнинг қайта тикланишини тезлаштириш учун ЎРВИ ва шамоллашда қандай овқатланиш керак? Нутрициолог маслаҳат беради

Нутрициолог Наталя Гончарова тўғри овқатланиш билан организмга қандай ёрдам бериш кераклигини маълум қилди. Кўпинча юқумли касалликларда метаболик бузилишлар юзага келади: метаболизм ўз функцияларини бажармайди ва нафақат ошқозон-ичак тракти билан боғлиқ муаммолар, балки асоратлар — уйқучанлик, чарчоқ, циклнинг бузилиши, тери ҳолатининг ёмонлашиши ва бошқа нохуш ҳолатлар кузатилади. Бунинг учун организмнинг заифлашуви вақтида рационни тўғри тузиш керак, деб ёзади The Symbol.

Оч қолиш мумкин эмас

Юқумли касаллик вақтида организмни оч қолдириш мумкин эмас. Акс ҳолда, ҳужайралар одатдагидек ишлашни тўхтатади. Организм мавжуд энергия захираларини сарфлашга ўтади. Бу эса касалликдан кейинги тикланишни кечиктиради.

Мураккаб углеводлар

Мураккаб углеводларни ўз ичига олган озиқ-овқатларни истеъмол қилиш керак: дон, нўхат, ясмиқ, картошка, сабзи каби. Ўткир юқумли касалликларда базал метаболизм интенсивлигининг ошиши туфайли энергияга бўлган эҳтиёж ортади, бу биринчи навбатда углеводлар билан таъминланади. Шу билан бирга, организмдаги углевод захиралари чекланган, шунинг учун тўқима оқсиллари, скелет мушаклари оқсиллари энергия алмашинувида фаол иштирок этади, бу эса организмни янада заифлаштиради.

Қанча оқсил керак?

Оқсил истеъмолини камайтириш керак эмас. Оғир интоксикация, иситма, диарея синдроми ва юқумли-токсик жараённинг бошқа кўринишлари билан кечадиган бир қатор юқумли касалликларда оқсил йўқотилиши кунига 150-200 граммга етиши мумкин. Осил етишмовчилиги овқат ҳазм қилиш ферментлари, антитолалар синтезининг бузилишига, қон зардоби бактерициди фаоллигининг пасайишига ва эндокрин тизимнинг чарчашига олиб келади.

Сув

Юқумли касаллик вақтида суюқлик истеъмол қилишни кўпайтириш керак. Терлашнинг кучайиши туфайли организм сувсизланишдан азият чекиши мумкин, шунинг учун илиқ ичимликлар, шу жумладан оддий сув организмни тезроқ тиклашга ёрдам беради.

Витаминлар ёрдами

Қоида тариқасида, юқумли касаллик вақтида полигиповитаминоз ҳодисалари қайд этилади, бу озиқ-овқат орқали витаминлар истеъмол қилишнинг пасайиши, организм томонидан уларга бўлган эҳтиёжнинг ошиши ва уларнинг ичакдан сўрилишининг ёмонлашиши билан боғлиқ. Ўткир инфекцияларда овқатланиш бузилишининг энг муҳим омили термогенез ва метаболик стресснинг кучайиши туфайли организмда энергия ҳаракатларининг ортиши ҳисобланади. Шунинг учун қўшимча витаминлар қабул қилиш керак. Мисол учун, C, D витамини, рухга бой маҳсулотлар истеъмол қилишни ошириш тавсия этилади.

Ёғлар керакми?

Аммо юқумли касалликлар шароитида ёғ миқдорини камайтириш яхшироқ. Лекин тўйинмаган ёғли кислоталар — ўсимлик мойлари ёки омега қўшимчаларини қабул қилиш мумкин.