Tan olinmagan Tog‘li Qorabog‘ respublikasi prezidenti Arayik Arutyunyan tadbirkor va milliarder Ruben Vardanyanni yangi bosh vazir etib tayinladi. Bu haqda prezidentning rasmiy saytida xabar berilgan. Xuddi shu farmon bilan sobiq bosh vazir Artak Beglaryan lavozimidan ozod etilgan.
Sentabr oyida Ruben Vardanyan Rossiya fuqaroligidan voz kechib, Tog‘li Qorabog‘ga ko‘chib o‘tganini ma’lum qilgandi. Shundan so‘ng tan olinmagan respublika rahbari Vardanyanga respublika bosh vazir lavozimini egallashni taklif qildi.
Vardanyanning so‘zlariga ko‘ra, u Tog‘li Qorabog‘ aholisi, respublikaning siyosiy va jamoat arboblari bilan uchrashganidan so‘ng hukumat rahbari bo‘lish to‘g‘risida qaror qabul qilgan, chunki ular ushbu lavozimga tadbirkorning nomzodini qo‘llab-quvvatlashini bildirgan.
Rossiya-armanistonlik Ruben Vardanyan — “Troyka Dialog” investitsion kompaniyasining sobiq egasi, “Skolkovo” biznes-maktabi asoschisi. 2021-yilda Forbes jurnali uning boyligini bir milliard dollarga baholagan, u Rossiyaning 200 nafar eng boy odamlari ro‘yxatida 116-o‘rinni egallagan edi.
2022-yil sentabri o‘rtalarida Armaniston va Ozarbayjon chegarasida jangovar harakatlar qayta boshlandi. Nizo tomonlari vaziyatni keskinlashtirishda bir-birini aybladi. Rasmiy ma’lumotlarga ko‘ra, o‘shanda 200 dan ortiq odam halok bo‘lgan. Turli darajadagi to‘qnashuvlar oktabrda ham davom etmoqda.
Izoh (0)