Самарқандда бўлиб ўтаётган иқтисодий форум доирасида Марказий банк раиси Мамаризо Нурмуродов «Дарё» мухбирига интервью берди. Суҳбатда АҚШда асосий ставка ошишининг Ўзбекистонга таъсири, келгусидаги вазифалар ва форумнинг аҳамияти ҳақида сўз борди.
«Пул бозорида нархлар қимматлашади»
АҚШда асосий ставканинг оширилиши нафақат Ўзбекистонга, балки бутун глобал иқтисодиётга ўз таъсирини кўрсатади. Бу пул бозорларида доллар билан боғлиқ транзакциялар ва инвестициялар нархлари қимматлашишига олиб келади. Доллар шаклидаги депозитлар, ривожланаётган давлатлардаги қимматли қоғозлар даромадлилик кўрсаткичи ҳам шунга ҳамоҳанг тарзда ошиб боради. Иккинчи томони, бизга кирадиган инвестициялар ҳам ўша даромадлиликка қараганда юқори даражадаги шароит бўлгандагина киради. Буни албатта, таъсири бўлади.
Хорижий бозорларда долларда бўлган кредит линияларини олиб келиш қимматлашади. АҚШда асосий ставка 8,5 фоизга чиқди. Тасаввур қилинг, кредитни давлат 8,5 фоизда олиб кирса, тижорий банкларнинг олиб келиши 10 фоиздан юқори бўлиши мумкин. Ҳозирги шароитда 10 фоиз кредит олиб юрган бизнинг субъектларимиз учун келажакда 12-14 фоиздан валютавий кредит таклиф қилинади. Бу ўз-ўзидан доллардаги, хорижий валютадаги кредитларни маълум жиҳатдан қимматлаштиради. Бозоримизга таъсири шу орқали бўлади.
Бизни ривожлантирадиган ва иқтисодиётимизни драйвери бўлиб молиявий таъминлайдиган нарса биринчи навбатда, ички манбалар ва ресурслардир. Шу билан бирга, хусусий ва хорижий инвестициялар ҳисобланади. Кейинги йил асосий урғуни мана шу икки йўналишга қаратамиз.
«Ноаниқликлар кўп»
Ҳар бир ноаниқлик ортида битта хавф туради. Бу хавф сабабли ҳозирги монетар сиёсатда ҳали қўлланмаган инструментлардан фойдаланишга мажбур бўламиз. Шу нуқтаи назардан доимо ишлашимизга тўғри келади. Иқтисодий форумда йиғилиб мулоқот қилаётганимиз ҳам худди шундан. Бу тадбирга 12 та давлатнинг марказий банклари раислари келган. Улар билан вазият қандайлиги, қайси вазиятга улар қанақа реакция қилаётгани ва қандай натижага эришаётгани, қўллаётган инструментлари тўғрисида суҳбатлашяпмиз. Бу борада ўзаро фикр алмашиб, ўзимизга инструментларимиздан фойдаланиш даражасини белгилаб олиш бўйича ишлаяпмиз. Бу форум шу нуқтаи назардан бизга қулай. Айтиш мумкинки, қимматли, фойдали ва омадли форум. Телефонда гаплашгандан кўра, юзма-юз мулоқот яхши самара беради. Албатта, хорижлик ҳамкасбларимизга ҳам Ўзбекистон тажрибаси қизиқ. Кеча Қозоғистон марказий банки раҳбари билан 1 соатдан ортиқ вақт давомида суҳбатлашдик. Бундай учрашувлар жуда фойдали деб ўйлайман.
Изоҳ (0)