Ҳиндистон мамлакатда ишлаб чиқарилган шакар экспортига чекловларни 2023 йил октябригача узайтирди. Бу ҳақда Reuters хабар бермоқда.
Шундай қилиб, Ҳиндистон ҳукумати томонидан жорий йилнинг 1 июнидан шакар экспортига киритилган чекловлар яна бир йилга узайтирилди.
Кейин «ички бозорда шакар мавжудлиги ва унинг барқарор нархини сақлаб қолиш учун» ушбу маҳсулотни 10 миллион тоннагача экспорт қилишга рухсат берилди.
Буюртмалар 31 октябргача амал қилади. Мамлакатда бу йил шакар экспорти олти йил ичида биринчи марта қисқартирилди.
Ҳиндистон Саноат ва савдо вазирлиги маълумотларига кўра, 2021—2022 маркетинг йилида (сентябрда якунланган) Ҳиндистонда рекорд миқдорда шакарқамиш йиғиб олинган — 50 миллион тоннадан ортиқ ва 35,7 миллион тонна шакар ишлаб чиқарилган.
Ҳиндистон дунёдаги энг йирик шакар ишлаб чиқарувчиси. Индонезия, Афғонистон, Шри-Ланка, Бангладеш, БАА, Малайзия ва африкалик ҳамкорлар унинг ушбу турдаги маҳсулотнинг асосий импортчилари ҳисобланади.
Бунинг Ўзбекистонга таъсири қандай?
Давлат статистика қўмитасининг маълумотларига кўра, 2022 йилнинг январь—сентябрь ойларида Ўзбекистон 10 та хорижий давлатлардан қиймати 33,2 млн долларлик 48,6 минг тонна шакар импорт қилган.
Ўтган 9 ой давомида Ўзбекистон энг кўп шакарни Ҳиндистондан импорт қилган — 24 минг тонна. Кейинги ўринларда Покистон (11 минг тонна) ва БАА (6,8 минг тонна) жойлашган.
Ҳиндистоннинг ушбу тақиқидан сўнг, келгуси бир йил ичида Ўзбекистон шакар импортидаги асосий ҳамкорини йўқотади.
Бу фонда мамлакатда маҳаллий шакар ишлаб чиқариш ортиб бормоқда — Ўзбекистонда иккита завод бор, бироқ улар хом ашёга муҳтож.
Аввалроқ Ўзбекистон Украина ва Россия шакарисиз қолгани ҳақида хабар берилган эди.
Изоҳ (0)