Surxondaryo viloyati Angor tumanida xizmat avtotransport vositasini 15,5 million so‘mga sotib yuborgan sobiq rahbar aniqlandi. Bu haqda Iqtisodiy jinoyatlarga qarshi kurashish departamenti xabar berdi.
Ta’kidlanishicha, Bosh prokuratura huzuridagi departamentning Angor tumani bo‘limi tomonidan tuman Aholi bandligiga ko‘maklashish markazining murojaatiga asosan tergovga qadar tekshiruv o‘tkazilgan. Unda markazning sobiq direktori A.Yu. ushbu markazning Lacetti-2 rusumli avtotransport vositasini 2021-yil 13-dekabrda auksion savdosi orqali sotish mazmunidagi yig‘ilish bayonnomasini tayyorlab, aslida 98,2 million so‘mlik avtomobilni “S.S.” MCHJ tomonidan o‘tkazilgan auksion savdosi orqali fuqaro J.Y.ga 15,5 million so‘mga sotilgani to‘g‘risida hujjatlarni rasmiylashtirib, o‘zganing mulkini o‘zlashtirish yo‘li bilan talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)