«Дарё»да Нукуснинг марказий кўчаларида «шумахерлар» пайдо бўлгани хабар берилганди. «Дарё» мухбири сўровига жавобан, Қорақалпоғистон ЙҲХБ матбуот хизмати раҳбари Турсинбай Ўтемуратовнинг дрифт қилган Cobalt шаҳар камералари орқали қидирилаётганини билдирганди.
Бошқарма матбуот хизматининг бугунги хабарига кўра, рақамсиз Cobalt топилган.
Маълум бўлишича, Cobalt ҳайдовчиси Данияр Машарипов 22 октябрь куни дўстлари билан дрифт қилиш бўйича баҳс боғлаган. Шундан кейин у соат 03:00 лар атрофида Нукуснинг Ўзбекистон (собиқ Тўрткўл) гузари, Беруний ва Аллаяр Дўсназаров кўчаларида машинанинг давлат рақамини ечиб, қарама-қарши йўналишда дрифт қилган.
Ички ишлар ходимлари билмасин деб машина рақамларини ечгандим. Қилган ишимдан пушаймонман. Бошқаларга бундай қилишни тавсия қилмайман, — дейди ҳайдовчи.Бошқарма командири Жақсимурат Тўрениязовнинг айтишича, Cobalt рақами 95 884 BBА эканлиги аниқланган. Ҳайдовчига Маъмурий жавобгарлик тўғрисидаги кодекснинг 128-5-моддаси иккинчи қисмига асосан базавий ҳисоблаш миқдорининг ўн баравари миқдорида жарима солинган. Машинанинг ўзи эса жарима майдончасига жойлаштирилган.
Изоҳ (0)