Фарғонада ўзбек футболининг 110 йиллиги муносабати билан 25-26 октябрь кунлари катта футбол байрами бўлиб ўтди. Бу ҳақда «Дарё» мухбири Азизжон Эрматов хабар бермоқда.
Ўзбек футболининг таниқли юлдузлари, футбол фахрийлари ҳамда ЎФА биринчи вице-президенти Равшан Эрматов бошчилигидаги делегация Фарғона вилоятига ташриф буюрди.
Шу куни меҳмонлар вилоят ҳокими – вилоят футбол ассоциацияси президенти Хайрулло Бозоров билан учрашди. Учрашувда Хайрулло Бозоровга «Ўзбекистон футболи ривожига қўшган ҳиссаси учун» кўкрак нишони топширилди.Ўзбек футболининг 110 йиллиги муносабати ўтказилган асосий тадбирлар Одил Аҳмедов, Биродар Абдураимов, Тўлаган Исоқов ва ўзбек футболининг фахрий юлдузлари иштирокида «Истиқлол» ўйингоҳида давом этди.
Ўзбекистон ва Фарғона вилояти фахрийлар терма жамоалари Қирғизистон ва Тожикистон фахрийлар терма жамоаларига қарши бир таймлик учрашувларда майдонга чиқди.
Дастлабки учрашувда Ўзбекистон ва Тожикистон фахрийлар терма жамоалари майдонга чиқди. Одил Аҳмедов, Азамат Абдураимов, Шуҳрат Мақсудов, Усмон Тошев каби таниқли ўзбек футболчилари фарғоналик мухлислар қаршисида ажойиб ўйин намойиш этиб, 1:0 ҳисобида устун келди. Ягона голга Одил Аҳмедов муаллифлик қилди.
Анвар Бердиев, Акмал Холматов, Мансур Саидов, Сергей Лебедев каби «Нефтчи»нинг яқин ўтмишдаги юлдузлари Абдусамад Дўрмонов устозлигида Қирғизистон фахрийлар терма жамоасига қарши майдонга чиқди. Анвар Бердиев ва Шерзод Раимжоновнинг чиройли голлари 2:0 ҳисобидаги вилоят жамоаси ғалабасини таъминлади.
Ўзбекистон ва Фарғона вилояти фахрийлар терма жамоалари ўртасидаги финал учрашуви 0:0 ҳисоби билан якунланди. Пенальтилар сериясида ғалаба Ўзбекистон терма жамоасига насиб этди — 4:2.
Учинчи ўрин учун баҳсда тожикистонлик футболчилар Қирғизистон жамоаси устидан ишончли ғалаба қозонди — 3:0.
Изоҳ (0)