Farg‘onada o‘zbek futbolining 110 yilligi munosabati bilan 25-26-oktabr kunlari katta futbol bayrami bo‘lib o‘tdi. Bu haqda “Daryo” muxbiri Azizjon Ermatov xabar bermoqda.
O‘zbek futbolining taniqli yulduzlari, futbol faxriylari hamda O‘FA birinchi vitse-prezidenti Ravshan Ermatov boshchiligidagi delegatsiya Farg‘ona viloyatiga tashrif buyurdi.
Shu kuni mehmonlar viloyat hokimi – viloyat futbol assotsiatsiyasi prezidenti Xayrullo Bozorov bilan uchrashdi. Uchrashuvda Xayrullo Bozorovga “O‘zbekiston futboli rivojiga qo‘shgan hissasi uchun” ko‘krak nishoni topshirildi.O‘zbek futbolining 110 yilligi munosabati o‘tkazilgan asosiy tadbirlar Odil Ahmedov, Birodar Abduraimov, To‘lagan Isoqov va o‘zbek futbolining faxriy yulduzlari ishtirokida “Istiqlol” o‘yingohida davom etdi.
O‘zbekiston va Farg‘ona viloyati faxriylar terma jamoalari Qirg‘iziston va Tojikiston faxriylar terma jamoalariga qarshi bir taymlik uchrashuvlarda maydonga chiqdi.
Dastlabki uchrashuvda O‘zbekiston va Tojikiston faxriylar terma jamoalari maydonga chiqdi. Odil Ahmedov, Azamat Abduraimov, Shuhrat Maqsudov, Usmon Toshev kabi taniqli o‘zbek futbolchilari farg‘onalik muxlislar qarshisida ajoyib o‘yin namoyish etib, 1:0 hisobida ustun keldi. Yagona golga Odil Ahmedov mualliflik qildi.
Anvar Berdiyev, Akmal Xolmatov, Mansur Saidov, Sergey Lebedev kabi “Neftchi”ning yaqin o‘tmishdagi yulduzlari Abdusamad Do‘rmonov ustozligida Qirg‘iziston faxriylar terma jamoasiga qarshi maydonga chiqdi. Anvar Berdiyev va Sherzod Raimjonovning chiroyli gollari 2:0 hisobidagi viloyat jamoasi g‘alabasini ta’minladi.
O‘zbekiston va Farg‘ona viloyati faxriylar terma jamoalari o‘rtasidagi final uchrashuvi 0:0 hisobi bilan yakunlandi. Penaltilar seriyasida g‘alaba O‘zbekiston terma jamoasiga nasib etdi — 4:2.
Uchinchi o‘rin uchun bahsda tojikistonlik futbolchilar Qirg‘iziston jamoasi ustidan ishonchli g‘alaba qozondi — 3:0.
Izoh (0)