Тошкент вилоятида ер олди-сотдиси билан боғлиқ жиноят фош этилди, деб хабар бермоқда Бош прокуратура матбуот хизмати.
Маълум қилинишича, фуқаро Г.К.нинг ИИВ Ер ресурслари талон-торож қилинишига қарши курашиш бўлимига қилган мурожаатига асосан, Бош прокуратура ҳамда бошқа ҳуқуқни муҳофаза қилувчи орган ходимлари билан ҳамкорликда тезкор тадбир ўтказилган.
Аниқланишича, Р.Ю. Зангиота тумани ҳокимининг 2012 йилдаги қарори билан «Ўртасарой» маҳалласи ҳудудидаги фуқаро С.Ю.га 30 йил муддатга ижара асосида ажратилган жами 1 гектар лалми ер майдонини 80 минг долларга сотишга ҳамда ҳокимият тизимидаги мансабдор танишлари орқали тегишли ҳужжатларни расмийлаштириб беришга ваъда берган. Келишилган пуллардан 10 минг долларни ариза муаллифидан фирибгарлик йўли билан олаётган вақтида ашёвий далиллар билан ушланган.
Мазкур ҳолат юзасидан Р.Ю.га нисбатан Жиноят кодексининг 168-моддаси 4-қисми «а» банди (жуда кўп миқдорда фирибгарлик) ва 28, 211-моддаси 3-қисми «а» банди (жуда кўп миқдорда пора бериш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)