Ўзбекистон Инвестициялар ва ташқи савдо вазирлигида 20 октябрь куни DP World компанияси вакиллари билан учрашув бўлиб ўтди, деб хабар бермоқда «Дунё» ахборот агентлиги.
Қайд этилишича, унда компаниянинг мамлакатдаги инфратузилмавий ривожланиш, логистика ва электрон тижорат соҳасидаги бир қатор инвестиция лойиҳаларини амалга оширишда иштирок этиш истиқболлари кўриб чиқилган.
Маълумот учун, DP World дунёдаги энг йирик порт операторларидан бири бўлиб, 2005 йилда Dubai Ports Authority ва Dubai Ports International бирлашиши натижасида ташкил этилган. Компания 78 та денгиз ва ички терминалларга эга. Улар компаниянинг олтита қитъадаги 40 мамлакатда жойлашган 50 дан ортиқ корхоналари томонидан бошқарилади. Компания асосан ривожланаётган ва ривожланган бозорларда фаолият юритади. Унинг таркибига портлар ва терминаллар, саноат парклари, логистика ва иқтисодий зоналар, яхталар тўхтайдиган жойлар киради.
Музокаралар давомида компания вакиллари Ўзбекистоннинг инвестициявий муҳити, хорижий инвесторлар учун жорий қилинган имтиёз ва преференциялар ҳамда уларнинг фаолияти кафолатининг меъёрий-ҳуқуқий базаси билан батафсил танишган. Транспорт-логистика хизматларини кўрсатиш, жумладан, транспорт-логистика марказларини яратиш ва логистика жараёнларини оптималлаштириш бўйича хизмат кўрсатиш, шунингдек, эркин иқтисодий ва кичик саноат зоналарини ривожлантириш каби йўналишлар Ўзбекистонда компаниянинг самарали фаолияти учун устувор йўналишлар сифатида кўриб чиқилган.
Музокаралар якунида компания вакиллари Тошкент вилоятида замонавий логистика марказини қуришга қизиқиш билдирган. Ўз навбатида, вазирлик раҳбарияти қўшма лойиҳаларни амалга оширишни ҳар томонлама қўллаб-қувватлашга тайёр эканини тасдиқлаган.
Изоҳ (0)