Britaniyalik yozuvchi Joan Roulingning asari asosida suratga olingan “Garri Potter” filmida Drako Malfoy rolini o‘ynagan aktyor Tom Felton o‘zining “Sehrli tayoqcha ortida: jodu va tartibsizlikda o‘sgan sehrgar” (“Beyond the Wand: The Magic and Mayhem of Growing Up Wizard”) nomli xotira kitobida rejissor Kris Kolambus Deniel Redkliff va Rupert Grint suratga olish maydonchasida o‘zini yomon tutgani uchun jarimaga tortilgani haqida gapirdi.
Amerikalik rejissor Kris Kolambus “Garri Potter”ning birinchi ikkita filmiga — 2001-yilda suratga olingan “Garri Potter va hikmatlar toshi”, 2002-yilda namoyish etilgan “Garri Potter va maxfiy hujra” filmlariga rejissorlik qilgan. Feltonning so‘zlariga ko‘ra, Kolambus aktyor bolalarni nazorat qilish tizimini ishlab chiqqan. “Har safar kimdir dublni buzsa, unga qizil kartochka ko‘rsatishardi. U sumkasiga 10 funt solish kerakligini aytardi. Suratga olish jarayonlarining oxirida barcha pullar xayriya ishlariga sarf qilindi”, — deydi aktyor.
Feltonning so‘zlariga ko‘ra, bu “yaxshi reja” edi, biroq u har doim ham ish bermagan. Ayniqsa, Ron Uizli rolini ijro etgan aktyor Rupert Grintni boshqarish qiyin bo‘lgan. “O‘ylashimcha, u filmning ikkita qismida 2 800 dollardan ko‘proq pul to‘lagan – u bo‘lar-bo‘lmasga kulaverardi”, — deya qo‘shimcha qildi Felton.
Mavzuga doir:
Izoh (0)