Ўзбекистон Республикаси Президентининг 2022 йил 9 сентябрдаги «Энергия тежовчи технологияларни жорий қилиш ва кичик қувватли қайта тикланувчи энергия манбаларини ривожлантириш бўйича қўшимча чора-тадбирлар тўғрисида»ги ПФ-220-сон фармонига асосан, гидроэнергетика йўналишига тегишли бандлар ижросини таъминлаш борасида «Ўзбекгидроэнерго» АЖ томонидан изчил ишлар амалга оширилмоқда.
Таъкидлаш жоизки, микро ва кичик гидроэлектр станцияларини қуришга доир бизнес лойиҳаларининг жозибадорлигини ошириш орқали соҳага хусусий инвестицияларни кенгроқ жалб қилиш борасида тадбиркорлик билан шуғулланиш истагидаги тадбиркорлик субъектлари ва лойиҳани амалга ошириш учун керакли маълумотлар билан яқиндан таништириш борасида жисмоний ва юридик шахслар учун Наманган, Фарғона, Самарқанд, Қашқадарё, Сурхондарё ва Тошкент вилоятларида учрашувлар, очиқ мулоқотлар, тарғибот тадбирларининг ўтказилиши таъминланди.
Ўтказилган тарғибот тадбирларида Фармон мазмун-моҳияти билан боғлиқ махсус видеоролик, слайд ва тарқатма материаллар орқали тадбиркор ва талабгорларга зарурий ахборотлар берилди, тегишли тушунтиришлар берилди, гидроэнергетикани янада ривожлантириш борасида мамлакатимизда хусусий сектор вакиллари учун яратилаётган қулайликлар таништирилди.
Маълумот учун: микро ва кичик ГЭС қуриш учун ер майдонлари тадбиркорларга камида 20 йил муддатга текинга ижарага берилади.
Асосий фаолияти кичик гидроэлектр станциялари қурилмаларини ишлаб чиқариш бўлган юридик шахслар уч йил муддатга юридик шахсларнинг фойда солиғи ҳамда мол-мулк солиғини белгиланган ставкаларнинг 50 фоизи миқдорида тўлайди.
2022 йил 1 октябрдан бошлаб қуввати 5 МВтгача бўлган гидроэлектр станцияларда ишлаб чиқарилган электр энергияси «Ҳудудий электр тармоқлари» АЖ ва давлат томонидан электр энергиясини харид қилувчи функцияси (ваколати) берилган орган томонидан кафолатланган тарзда сотиб олинади.
Қуввати 5 МВтгача бўлган гидроэлектрстанцияларни қуриш бўйича лойиҳа ташаббускорлари (кейинги ўринларда – лойиҳа ташаббускорлари) Энергетика вазирлиги буюртмаси асосида «Э-Аукцион» электрон савдо майдончасида ўтказиладиган ишлаб чиқарилган электр энергиясини сотиб олиш тарифини пасайтириб бориш юзасидан электрон аукцион натижалари асосида аниқланади. Бунда, бошланғич нарх II гуруҳ истеъмолчилари учун белгиланган тарифга нисбатан:
- қуввати 500 кВтгача бўлган гидроэлектрстанцияларга 150 фоиз миқдорида;
- қуввати 500 кВтдан 2 МВтгача бўлган гидроэлектрстанцияларга 120 фоиз миқдорида;
- қуввати 2 МВтдан 5 МВтгача бўлган гидроэлектрстанцияларга 100 фоиз миқдорида белгиланади.
«Ўзбекгидроэнерго» АЖ томонидан тадбиркорларга қулайликлар яратиш борасида микро ва кичик ГЭСларга оид маълумотларни олишлари ҳамда Жамиятнинг тегишли мутахассислари билан тўғридан-тўғри боғланишлари учун телеграм ижтимоий тармоғида «Мен ҳам ГЭС қураман» махсус боти ишга туширилди.
Мазкур бот орқали микро ва кичик ГЭСларни қуришга оид қонуний асослар, яратилаётган имкониятлар, таклиф этилаётган лойиҳа майдонлари ва мутахассисларга тўғридан-тўғри мулоқот қилиш учун алоқа маълумотлари берилади.
Эндиликда хусусий сектор вакиллари, тадбиркорлик субъектлари ортиқча оворагарчиликлардан қутулиш имкониятига эга бўлишади. Узоқ масофадан туриб ҳам махсус бот орқали микро ва кичик гидроэлектрстанцияларни қуриш учун таклиф этилаётган лойиҳаларнинг ҳудудлар бўйича жойлашув манзилларини танлаб, ўз таклифларини билдириш имконияти яратилди.
Аҳоли ва тадбиркорлар ўртасида ушбу йўналишда кенг тарғибот тадбирлари давом эттирилмоқда.
Реклама ҳуқуқи асосида.
Изоҳ (0)