Ўзбекистон Халқаро қишлоқ хўжалиги университети раҳбарияти Германиянинг Weihenstephan-Triesdorf амалий фанлар университети вакиллари билан музокаралар ўтказди, деб хабар бермоқда «Дунё» ахборот агентлиги.
Қайд этилишича, учрашув давомида ҳар икки университет вакиллари ўз фаолияти юзасидан тақдимот ўтказган.
Германия университети 1971 йилда Бавария федерал ўлкасида ташкил этилган. У қишлоқ хўжалиги соҳасида малака ошириш дастурлари ва «Аграр менежмент» халқаро магистратура курси бўйича мутахассислар тайёрлайди, дунёнинг 60 дан ортиқ таълим муассасалари билан ҳамкорлик қилади. Ўз навбатида, Ўзбекистон томони жорий йилда Буюк Британиянинг энг қадимги қишлоқ хўжалиги олий таълим муассасаси бўлган Қироллик қишлоқ хўжалиги университети (RAU) билан биргаликда Халқаро қишлоқ хўжалиги университети (ХҚХУ) очилгани ҳақида маълум қилган.
Музокаралар натижасига кўра, ХҚХУ талабаларини Германиянинг Weihenstephan-Triesdorf амалий фанлар университети магистратурасига беғараз асосда ўқишга юбориш, шунингдек, ХҚХУ ҳузуридаги Кадрларни қайта тайёрлаш ва уларнинг малакасини ошириш маркази негизида немис университети билан ҳамкорликда чорвачилик ва боғдорчилик соҳасида Германия тажрибасига асосланган давлат ва хусусий секторда фаолият юритаётган соҳа вакиллари, шунингдек, фермер хўжаликлари, кластерлар раҳбарлари ва мутахассислари учун малака ошириш курсларини ташкил этиш бўйича келишувга эришилган.
Ўзбекистон делегацияси, шунингдек, Германиянинг қишлоқ хўжалиги корхоналари, чорвачилик ва сут маҳсулотлари етиштиришга ихтисослашган фермер хўжаликлари фаолиятини кўздан кечирган.
Изоҳ (0)