O‘zbekiston Xalqaro qishloq xo‘jaligi universiteti rahbariyati Germaniyaning Weihenstephan-Triesdorf amaliy fanlar universiteti vakillari bilan muzokaralar o‘tkazdi, deb xabar bermoqda “Dunyo” axborot agentligi.
Qayd etilishicha, uchrashuv davomida har ikki universitet vakillari o‘z faoliyati yuzasidan taqdimot o‘tkazgan.
Germaniya universiteti 1971 yilda Bavariya federal o‘lkasida tashkil etilgan. U qishloq xo‘jaligi sohasida malaka oshirish dasturlari va “Agrar menejment” xalqaro magistratura kursi bo‘yicha mutaxassislar tayyorlaydi, dunyoning 60 dan ortiq ta’lim muassasalari bilan hamkorlik qiladi. O‘z navbatida, O‘zbekiston tomoni joriy yilda Buyuk Britaniyaning eng qadimgi qishloq xo‘jaligi oliy ta’lim muassasasi bo‘lgan Qirollik qishloq xo‘jaligi universiteti (RAU) bilan birgalikda Xalqaro qishloq xo‘jaligi universiteti (XQXU) ochilgani haqida ma’lum qilgan.
Muzokaralar natijasiga ko‘ra, XQXU talabalarini Germaniyaning Weihenstephan-Triesdorf amaliy fanlar universiteti magistraturasiga beg‘araz asosda o‘qishga yuborish, shuningdek, XQXU huzuridagi Kadrlarni qayta tayyorlash va ularning malakasini oshirish markazi negizida nemis universiteti bilan hamkorlikda chorvachilik va bog‘dorchilik sohasida Germaniya tajribasiga asoslangan davlat va xususiy sektorda faoliyat yuritayotgan soha vakillari, shuningdek, fermer xo‘jaliklari, klasterlar rahbarlari va mutaxassislari uchun malaka oshirish kurslarini tashkil etish bo‘yicha kelishuvga erishilgan.
O‘zbekiston delegatsiyasi, shuningdek, Germaniyaning qishloq xo‘jaligi korxonalari, chorvachilik va sut mahsulotlari yetishtirishga ixtisoslashgan fermer xo‘jaliklari faoliyatini ko‘zdan kechirgan.
Izoh (0)