Saudiya Arabistoni Ukrainaga 400 mln dollarlik gumanitar yordam ajratdi

Saudiya Arabistoni hukumati Ukrainaga 400 million dollarlik qo‘shimcha gumanitar yordam paketi ajratishga qaror qildi, Ukraina prezidenti Vladimir Zelenskiy qirollik bosh vaziri, valiahd shahzoda Muhammad bin Salmon bilan telefon suhbati chog‘ida unga buning uchun minnatdorlik bildirdi, deb yozadi “RBK”.

Shuningdek, Zelenskiy Saudiya Arabistoni BMT Bosh assambleyasida Donbass respublikalari, Zaporojye va Xerson viloyatlarining Rossiyaga qo‘shilishi haqidagi referendumlarni tan olishdan bosh tortish bo‘yicha rezolyutsiyani qo‘llab-quvvatlaganini ham tilga oldi. O‘shanda uni yoqlab 143 ta mamlakat ovoz bergan, beshtasi qarshi chiqqan, 35 ta davlat esa ovoz berishda qatnashmagandi.

O‘z navbatida, bin Salmon nizoni hal qilishda ishtirok etishini aytdi va Saudiya Arabistoni vositachilik sa’y-harakatlarini davom ettirishga tayyorligini ta’kidladi.

Avvalroq AQSH hukumati Saudiya Arabistonini OPEK+ (Neft eksport qiluvchi davlatlar tashkiloti) mamlakatlari bilan birga qabul qilingan qaror uchun tanqid qilgandi.

5-sentabr kuni OPEK+ davlatlari neft qazib olishni noyabr oyidan boshlab kuniga 2 million barrelga qisqartirishga kelishib oldi. AQSH prezidenti Jo Bayden, o‘z navbatida, neft qazib olish kvotalari qisqartirish qaroridan hafsalasi pir bo‘lganini bildirdi va AQSH ehtimoliy javob choralarini o‘rganayotgani haqida ogohlantirdi.

Keyinroq AQSH Davlat kotibi Entoni Blinken Vashington OPEK mamlakatlari qaroriga javob berishning turli variantlarini, jumladan Saudiya Arabistoni bilan munosabatlarni ham ko‘rib chiqayotganini aytdi.

AQSH Kongressi a’zolari OPEK+ mamlakatlarining neft qazib olishni qisqartirish haqidagi qarori fonida Saudiya Arabistoniga qurol sotishni to‘xtatishni taklif qildi.