Марказий банк томонидан хорижий валюта олди-сотдисига чеклов ўрнатилмагани маълум қилинди

Ижтимоий тармоқларда Ўзбекистон банклари чет эл валютасини сотиб олишга чеклов жорий қилгани, жумладан, йирик банклар ва филиалларда бу чеклов 1,5 минг долларни, кичикларида эса 500 долларни ташкил қилаётгани ҳақида хабарлар тарқалди.

«Xabar.uz» мазкур маълумотга аниқлик киритиш учун боғланган Марказий банк мутахассисига кўра, айни вақтда жисмоний шахслар томонидан тижорат банклари орқали чет эл валютасини сотиб олиш ва сотиш, шунингдек, пул ўтказмаларини амалга ошириш чекловларсиз амалга оширилмоқда.

Марказий банк томонидан ҳеч қандай чеклов ўрнатилмаган. Агар фуқароларимиз банкларда шундай фактларни аниқлаган бўлишса, ўша банк маъмуриятидан изоҳ сўрашлари мумкин. Мутахассисларимиз биз томондан бундай кўрсатма бўлмаганини айтишди, — дейди Марказий банк матбуот котиби Акмал Назаров. 

Унинг таъкидлашича, банклар ўз фаолиятларини ташкиллаштиришда мустақил ҳисобланади.

Нақд хорижий валютанинг вақтинча тақчиллиги банкларнинг узоқдаги филиалларига нақд пул белгиларининг логистикаси билан боғлиқ бўлиши мумкин, — дейди Акмал Назаров.