Путиннинг атрофидаги одамлар Алина Кабаевага 15 йилдан бери ёрдам бериб келмоқда

Путиннинг атрофидаги одамлар Алина Кабаевага 15 йилдан бери ёрдам бериб келади. Бу ҳақда «Досье» марказининг текширувларига таяниб, Meduza хабар берди.

Алина Кабаева Россиянинг Украинага бостириб кирганидан бери Россия президенти Владимир Путинга энг яқин одамлардан бири сифатида санкциялар остида қолди. Хусусан, Қўшма Штатлар Кабаева Путинга «камида учта бола» туғиб берди ва унинг шахсий бойлигини чет элда яширишда муҳим рол ўйнайди, деб ҳисоблайди. (The Wall Street Journal манбалари).

Россия президенти ва собиқ спортчи ҳеч қачон муносабатларини тасдиқламаган. 2008 йилда уларнинг тўйи ҳақида ёзган «Московский корреспондент» газетасига Путиннинг шахсан ўзи кескин муносабат билдирган ва мақола чоп этилганидан 10 кун ўтиб ёпилган. Шунга қарамай, президент атрофидаги одамлар Кабаевага камида 15 йилдан бери ёрдам бериб келади, деб ёзади «Досье» маркази ўзининг янги терговида.